ഇടുക്കി അണക്കെട്ട്​ തുറക്കേണ്ടിവന്നാൽ ജാഗ്രതാ നിര്‍ദ്ദേശം നല്‍കാന്‍ സൈറൺ

സിന്ധുമോള്‍ ആര്‍

തൊടുപുഴ: ഇടുക്കി അണക്കെട്ട്​ തുറക്കേണ്ട സാഹചര്യമുണ്ടായാൽ പരിസരവാസികൾക്ക് ജാഗ്രത നിർദേശം നൽകുന്നതിനായി ആദ്യപരീക്ഷണ സൈറൺ മുഴക്കി. ചൊവ്വാഴ്​ച രാവിലെ 11.20 ഓടെ ആയിരുന്നിത്​.​
ട്രയൽ സൈറൺ സംബന്ധിച്ച് മുൻകൂട്ടി അറിയിപ്പ് നൽകിയിരുന്നതിനാൽ പരിസരവാസികൾക്ക് ആശങ്കയ്ക്ക്​ ഇടനൽകിയില്ല. ട്രയൽ സൈറൺ ബുധനാഴ്​ചയും തുടരും.
അഞ്ചുകിലോമീറ്റർ ശബ്ദ ദൂരപരിധി ശേഷിയുള്ള സൈറനാണ് മുമ്പ്​​ ഉപയോഗിച്ചത്. പ്രദേശത്തി​​ന്റെ പ്രത്യേകതയെ തുടർന്ന് ശബ്ദം ഇത്രയും ദൂരം എത്തിയിരുന്നില്ല. അതുകൊണ്ട്​ ഇത്തവണ എട്ട് കിലോമീറ്റർ ദൂരപരിധിയിൽ ശബ്ദമെത്തുന്ന പുതിയ സൈറൺ ഡാമി​​ന്റെ വിവിധ ഭാഗങ്ങളിൽ​ വെച്ചാണ്​ ട്രയൽ നടത്തുന്നത്​.
ഏറ്റവും കൂടുതൽ ദൂരത്തേക്ക് ശബ്ദമെത്തുന്ന രീതിയിലായിരിക്കും സൈറൺ ക്രമീകരിക്കുന്നത്. ഡാം തുറക്കേണ്ട സാഹചര്യമുണ്ടായാൽ പരിസരവാസികൾക്ക് ജാഗ്രത നിർദേശം നൽകുന്നതിനായാണ്​ ഡാം ടോപ്പിൽ സൈറൺ മുഴക്കുന്നത്. എ.ഇ മലയരാജ്, ​കെ.എസ്​.ഇ.ബി സബ് എൻജിനീയർ സുനിൽകുമാർ, സബ് എൻജിനീയർ ഇൻചാർജ് ലാലി പി.ജോൺ, തുടങ്ങിയവരുടെ സാന്നിധ്യത്തിലായിരുന്നിത്.
ഇടുക്കി ഡാം ജലനിരപ്പിൽ ആശങ്കപ്പെടേണ്ട സാഹചര്യമില്ലെന്ന് കലക്ടർ എച്ച്. ദിനേശൻ. ചൊവ്വാഴ്​ച 2338 അടിയായിരുന്നു സംഭരണിയിലെ ജലനിരപ്പ്. 2373 അടിയാണ് ഷട്ടർലെവൽ. ഷട്ടർലെവലിൽനിന്ന്​ എട്ട്​ അടി താഴ്ചയിൽ 2365 അടിയിൽ ജലനിരപ്പ് ഉയരുമ്പോൾ നീല അലെർട്ടും 2371 അടിയിലെത്തുമ്പോൾ ഓറഞ്ച് അലർട്ടും 2372 അടി ജലനിരപ്പ് ഉയരുമ്പോൾ റെഡ് അലർട്ടും പ്രഖ്യാപിക്കും. ജലനിരപ്പ് ഷട്ടർ ലെവലിലെത്താൻ 35 അടികൂടി ആവശ്യമായതിനാൽ നിലവിൽ ഭീതിയുടെ സാഹചര്യമില്ല.