സിന്ധുമോള് ആര്
ന്യൂഡല്ഹി: വരുന്ന സ്വാതന്ത്ര്യദിനത്തില് കോവിഡില് നിന്നു മുക്തി നേടുമെന്നു പ്രതിജ്ഞയെടുക്കണമെന്ന് ആഹ്വാനം ചെയ്ത് പ്രധാനമന്ത്രി നരേന്ദ്ര മോദി. പ്രതിമാസ റേഡിയോ പരിപാടിയായ മന് കി ബാത്തില് സംസാരിക്കുകയായിരുന്നു അദ്ദേഹം.
കൊവിഡ് ഭീതി മാറ്റമില്ലാതെ നിലനില്ക്കുന്ന സാഹചര്യത്തിലാണ് നാം എന്നും മോദി പറഞ്ഞു. അമേരിക്കയും ബ്രസീലും കഴിഞ്ഞാല് കൊവിഡ് മഹാമാരി ഏറ്റവും കൂടുതല് ബാധിച്ച മൂന്നാമത്തെ രാജ്യമായി മാറിയിരിക്കുകയാണ് ഇന്ത്യ. ഇതുവരെ 13 ലക്ഷത്തിലധികം ആളുകളാണ് കൊറോണ ബാധിതരായിരിക്കുന്നത്.
‘ഒരു മഹാമാരിയുടെ നടുവില് വളരെ ദുഷ്കരമായ സാഹചര്യത്തിലാണ് ഇത്തവണ നാം സ്വാതന്ത്ര്യദിനം ആഘോഷിക്കാനൊരുങ്ങുന്നത്. ഈ മഹാവ്യാധിയില് നിന്നും സ്വാതന്ത്ര്യം നേടാനുള്ള പ്രതിജ്ഞ എടുക്കാന് രാജ്യത്തെ യുവജനങ്ങളോട് ഞാന് അഭ്യര്ത്ഥിക്കുന്നു. സ്വാശ്രയ ഇന്ത്യക്കായി ദൃഢനിശ്ചയം എടുക്കുക. പുതിയ കാര്യങ്ങള് പഠിക്കാനും പഠിപ്പിക്കാനും കടമകള് ആത്മാര്ത്ഥമായി നിര്വഹിക്കാനുമുള്ള ദൃഢനിശ്ചയം എടുക്കുക.’ മോദി പറഞ്ഞു.
വലിയ നഷ്ടങ്ങളെ നേരിടേണ്ടി വന്നുവെങ്കിലും രാജ്യം കോവിഡിനെതിരെ മികച്ച പോരാട്ടമാണ് നടത്തുന്നതെന്നും മോദി പറഞ്ഞു. വിജയകരമായ രോഗമുക്തി നിരക്കുകളാണ് ഉണ്ടായിക്കൊണ്ടിരിക്കുന്നത്. മറ്റുള്ളവരെ അപേക്ഷിച്ച് ഇന്ത്യയില് കോവിഡ് ബാധയില് നിന്നുള്ള രോഗമുക്തി നിരക്ക് വളരെ മികച്ചതാണ്.
ലക്ഷക്കണക്കിന് ആളുകളുടെ ജീവന് രക്ഷിക്കാന് നമുക്ക് സാധിച്ചു. എന്നാല്, കൊവിഡിന്റെ ഭീഷണിയെ മറികടക്കാന് ഇതുവരെ സാധിച്ചിട്ടില്ല. ജാഗ്രതയോടെ ഇരിക്കേണ്ടത് അത്യാവശ്യമാണ്. തുടക്കത്തിലേതുപോലെ തന്നെ അപകടകാരിയായി കൊറോണ നിലനില്ക്കുന്നു എന്ന് നാം മനസിലാക്കണം. മാസ്ക് ധരിക്കാന് ബുദ്ധിമുട്ട് പറയുന്നവര് സര്വസമയവും മാസ്ക് ധരിച്ച് നില്ക്കുന്ന ആരോഗ്യപ്രവര്ത്തകരെ കുറിച്ച് ചിന്തിക്കണമെന്നും മോദി പറഞ്ഞു.