ശ്രീജ.എസ്
ഗുരുവായൂര്: കൈനീട്ടിയാല് സാനിറ്റൈസര് പുറത്തുവരുന്ന യന്ത്രവുമായി ആറാം ക്ലാസുകാരന്. തിരുവെങ്കിടം വെള്ളറ ഷാജന്റെയും ബീനയുടെയും മകന് ഷാരോണാണ് കൈനീട്ടിയാല് ഉടന് സാനിറ്റൈസര് ലഭിക്കുന്ന കൊച്ചുയന്ത്രം ഉണ്ടാക്കിയത്. സെന്സര് ഘടിപ്പിച്ച സംവിധാനത്തിന് വെറും 503 രൂപയാണ് ചെലവായതെന്ന് ഷാരോണ് പറഞ്ഞു.
സെന്സറും സാനിറ്റൈസര് ഒഴിച്ചുവെക്കുന്ന പാത്രത്തില് വേണ്ട മോട്ടോറും ഓണ്ലൈനിലൂടെ വാങ്ങി. ചെറിയ കഷണം വയറും വാട്ടര് ട്യൂബും സാനിറ്റൈസര് ഒഴിച്ചുവെക്കാനുള്ള പാത്രവും മാത്രമാണ് മറ്റ് അസംസ്കൃത വസ്തുക്കള്. സോള്ഡറിങ്ങിനും മറ്റും പിതാവ് ഷാജന്റെ സഹായം ലഭിച്ചുവെന്ന് ഷാരോണ് പറഞ്ഞു. കൈകൊണ്ട് അമര്ത്തുകയോ, കാലുകൊണ്ട് ചവിട്ടുകയോ വേണ്ട എന്ന സുരക്ഷിതത്വവുമുണ്ട്. നേരത്തെ ഇതുപോലെ പുല്ലുവെട്ടിയന്ത്രവും ഈ കൊച്ചുശാസ്ത്രജ്ഞന് നിര്മിച്ചിട്ടുണ്ട്.