ശ്രീജ.എസ്
ന്യൂഡല്ഹി: സര്വകലാശാലകളിലെ അവസാന വര്ഷ പരീക്ഷകള് സെപ്റ്റംബര് 30നു മുന്പ് നടത്താനുള്ള തീരുമാനം റദ്ദാക്കണമെന്ന വിദ്യാര്ഥികളുടെ ആവശ്യം പരിഗണിക്കുന്നത് സുപ്രീം കോടതി ഓഗസ്റ്റ് പത്തിലേക്കു മാറ്റി.
ഇടക്കാല ഉത്തരവ് വേണമെന്ന വിദ്യാര്ത്ഥികളുടെ ആവശ്യം കോടതി അംഗീകരിച്ചില്ല. ആഭ്യന്തര മന്ത്രാലയത്തിന്റെ നിലപാട് എന്താണെന്ന് അറിയിക്കാന് സോളിസിറ്റര് ജനറല് തുഷാര് മേത്തയ്ക്ക് ജസ്റ്റിസ് അശോക് ഭൂഷണ് അധ്യക്ഷനായ ബെഞ്ച് നിര്ദേശം നല്കി.
ഓഗസ്റ്റ് മൂന്നോടെ മറുപടി അറിയിക്കാമെന്ന് സോളിസിറ്റര് ജനറല് അറിയിച്ചു. അതേസമയം, സെപ്റ്റംബറില് തന്നെ അവസാന വര്ഷ പരീക്ഷകള് നടത്തണമെന്ന നിലപാടില് ഉറച്ചുനിന്ന യുജിസി, പരീക്ഷയ്ക്കു തയാറെടുക്കേണ്ടതില്ല എന്ന ധാരണ വിദ്യാര്ഥികള്ക്കു വേണ്ടെന്നു ചൂണ്ടിക്കാട്ടി.