![“Manju”](https://santhigirinews.org/wp-content/uploads/2020/04/YOUTUBE.jpg")
സ്റ്റാഫ് റിപ്പോര്‍ട്ടര്‍
അല്‍ റയ്യാന്‍: കാലാവസ്ഥയിലുണ്ടാകുന്ന മാറ്റം കൊറോണ വൈറസിന്റെ വ്യാപനത്തെ സ്വാധീനിക്കുമെന്നും കനത്ത ചൂടും ഹ്യൂമിഡിറ്റിയും വൈറസിനെ ദുര്‍ബലമാക്കുമെന്നും പഠനം. ഖത്തര്‍ ഫൗണ്ടേഷന്റെ കീഴിലുള്ള ഖത്തര്‍ എന്‍വയണ്‍മെന്റ് & എനര്‍ജി റിസര്‍ച്ച് ഇന്‍സ്റ്റിറ്റ്യൂട്ടിലെ (ക്യു.ഇ.ഇ.ആര്‍.ഐ) ശാസ്ത്രജ്ഞനായ ജിയോവാനി സാബിയയാണ് കോവിഡ്-19ഉം കാലാവസ്ഥയും തമ്മിലുള്ള ബന്ധം സംബന്ധിച്ച്‌ വ്യക്തമാക്കിയിരിക്കുന്നത്. എന്നാല്‍, അന്തരീക്ഷത്തിലെ ചൂടുകാരണം വൈറസ് പൂര്‍ണമായും അപ്രത്യക്ഷമാകുമെന്നത് തീര്‍ത്തും തെറ്റാണ്. ചൂടുള്ള അന്തരീക്ഷത്തിലും മുന്‍കരുതലുകള്‍ പാലിക്കണമെന്നും അദ്ദേഹം ഓര്‍മിപ്പിച്ചു.
അഞ്ചുമാസം മുമ്ബ് ഖത്തറില്‍ ലോക്ഡൗണ്‍ നടപ്പാക്കുമ്പോഴുള്ള അവസ്ഥയല്ല നിലവിലുള്ളത്. വൈറസിന്റെ വ്യാപനത്തില്‍ കാലാവസ്ഥയുടെ സ്വാധീനമുണ്ടായിട്ടുണ്ടെന്നും സാബിയ വ്യക്തമാക്കുന്നു. സാര്‍സ് വൈറസിനെ പോലെ തന്നെ കൊറോണയും ഉയര്‍ന്ന ഘട്ടം പിന്നിട്ടതോടെ അതിന്റെ വ്യാപനത്തിലും ശക്തിയിലും കുറവുവന്നിട്ടുണ്ടെന്നും അദ്ദേഹം പറഞ്ഞു. കാലാവസ്ഥ സാഹചര്യങ്ങള്‍ വൈറസിന്റെ ശക്തിയെ കുറക്കും. അതിന്റെ വ്യാപനത്തില്‍ കുറവ് വരുത്തും. ലോകത്ത് കോവിഡില്‍ ഏറ്റവും കുറഞ്ഞ മരണനിരക്ക് ഖത്തറിലാണ്. ഖത്തറിനൊപ്പം തന്നെ വലുപ്പമുള്ള സിംഗപ്പൂരും കുറഞ്ഞ മരണനിരക്കില്‍ ലോകത്ത് മുന്നിലുണ്ട്.
