കാലിഫോര്ണിയയില് കിംഗ്സ് നദിയില് മുങ്ങിത്താണ കുട്ടികളെ ജീവിതത്തിലേക്ക് പിടിച്ചുകയറ്റിയ യുവാവ് മുങ്ങി മരിച്ചു
സിന്ധുമോള് ആര്
കാലിഫോര്ണിയ: ( 08.08.2020) അമേരിക്കയിലെ കാലിഫോര്ണിയയില് കിംഗ്സ് നദിയില് മുങ്ങിത്താണ മൂന്നു കുട്ടികളെ ജീവിതത്തിലേക്ക് പിടിച്ചുകയറ്റിയ രക്ഷാപ്രവര്ത്തകനായ ഇന്ത്യന് യുവാവ് മുങ്ങിമരിച്ചു. മന്ജീത് സിംഗ് (29) ആണ് മരിച്ചത്.
എട്ടു വയസ്സുകാരായ രണ്ട് പെണ്കുട്ടികളും 10 വയസ്സുള്ള ഒരു ആണ്കുട്ടിയുമാണ് നദിയില് വീണത്. ഇവര് നദിയില് മുങ്ങിത്താഴുന്നത് കരയ്ക്കു നിന്ന് കണ്ട മന്ജീത് നദിയിലേക്ക് എടുത്തുചാടുകയും കുട്ടികളെ കരയ്ക്കെത്തിക്കുകയുമായിരുന്നു. കുട്ടികളില് രണ്ടു പേര് സുരക്ഷിതരാണ്. ഒരാളുടെ നില ഗുരുതരമാണ്. വെള്ളത്തിനടിയില് 15 മിനിറ്റോളം കിടന്ന ഒരു പെണ്കുട്ടിയുടെ നിലയാണ് ഗുരുതരാവസ്ഥയിലുള്ളത്. ഇതിനിടെ മുങ്ങിപ്പോയ യുവാവിനെ 40 മിനിറ്റ് തിരച്ചില് നടത്തിയ ശേഷമാണ് വെള്ളത്തിനടിയില് നിന്നും പുറത്തെടുത്തത്. അപ്പോഴേക്കും മരണം സംഭവിച്ചിരുന്നു.