കാഷ്മീരില് ബ്ലോക്ക് ഡെവലപ്മെന്റ് കൗണ്സില് ചെയര്മാനെ ഭീകരര് വെടിവച്ചു കൊലപ്പെടുത്തി
സിന്ധുമോള് ആര്
ശ്രീനഗര്: ജമ്മുകാഷ്മീരില് ബ്ലോക്ക് ഡെവലപ്മെന്റ് കൗണ്സില് ചെയര്മാനെ ഭീകരര് വെടിവച്ചു കൊലപ്പെടുത്തി. ഖാഗ് ബ്ലോക്ക് ഡെവലെപ്പ്മെന്റ് കൗണ്സില് ചെയര്മാന് ഭൂപീന്ദര് സിംഗിനെയാണ് ഭീകരര് കൊലപ്പെടുത്തിയത്. ബുധനാഴ്ച രാത്രിയോടെ ബദഗാം ജില്ലയിലെ ദല്വാഷിലുള്ള വീടിന് സമീപത്തു വച്ചാണ് സംഭവം നടന്നത്. ഭൂപിന്ദറിന്റെ സുരക്ഷയ്ക്കായി രണ്ട് പോലീസ് ഉദ്യോഗസ്ഥരെ നിയോഗിച്ചിരുന്നു. ഇവര് ഇല്ലാത്ത സമയമാണ് സംഭവം നടന്നത്. വീട്ടിലേക്കു പോകവേ സുരക്ഷാ ഉദ്യോഗസ്ഥരെ ഖാഗ് പോലീസ് സ്റ്റേഷനില് അദ്ദേഹം ഇറക്കിയിരുന്നു. ഇതിനു പിന്നാലെയാണ് അദ്ദേഹത്തിന് വെടിയേറ്റത്. പോലീസില് അറിയിക്കാതെയാണ് അദ്ദേഹം വീട്ടിലേക്ക് പോയതെന്ന് ജമ്മുകാഷ്മീര് പോലീസ് പറഞ്ഞു.