പേരിലല്ല, ചിന്തയിലാണ് ഒരു വ്യക്തിയുടെ യഥാർത്ഥ സൗന്ദര്യം: അഡ്വ വീണ എസ് നായർ

തിരുവനന്തപുരം : പേരിലെ സാമുദായിക വാല് മുറിച്ചിട്ട് മതേതരത്വം സംസാരിച്ചാൽ മതി എന്ന് നിർബന്ധം പിടിച്ചിരുന്ന ഇടതുമുന്നണി അനുഭാവികളെ വിമർശിച്ച് അഭിഭാഷകയും കോൺഗ്രസ് പ്രവർത്തകയുമായ വീണ എസ് നായർ. തദ്ദേശ തിരഞ്ഞെടുപ്പിലെ ഇടതുമുന്നണി സ്ഥാനാർഥി ഗായത്രി ബാബു തന്റെ പെര് മാറ്റി ഗായത്രി എസ് നായർ എന്നാക്കി മാറ്റിയത് വാർത്തയായിരുന്നു, ഈ സാഹചര്യത്തിലാണ് വീണയുടെ വിമർശനം.

പേരിലല്ല, ചിന്തയിലാണ് ഒരു വ്യക്തിയുടെ യഥാർത്ഥ സൗന്ദര്യം എന്ന് വിശ്വസിക്കുന്ന വ്യക്തിയാണ് താനെന്നും തന്റെ പേര് മാറ്റണമെന്ന് പറയുന്നവർ വോട്ടിനു വേണ്ടി പേരു മാറ്റിയ ഇടതുമുന്നണി സ്ഥാനാർത്ഥിയുടെ പോസ്റ്ററുകൾ ഒന്ന് വായിച്ചു നോക്കണമെന്ന് അപേക്ഷിക്കുന്നതായും വീണ എസ് നായർ ഫെയ്സ്ബുക്കിൽ കുറിച്ചു.

തിരുവനന്തപുരം വഞ്ചിയൂർ വാർഡിലെ ഇടതുമുന്നണി സ്ഥാനാർത്ഥി ഗായത്രി ബാബു തന്റെ പേര് മാറ്റി ഗായത്രി എസ് നായർ എന്നാക്കിയത് സോഷ്യൽ മീഡിയയിൽ വിമർശനങ്ങൾക്ക് വഴിവെച്ചിരുന്നു. സാമുദായിക വോട്ട് ലക്ഷ്യം വെച്ചുകൊണ്ടാണ് പേരുമാറ്റം എന്നായിരുന്നു വിമർശനം. എന്നാൽ ഗായത്രി ബാബു എന്ന പേരിൽ അപരൻ വന്നതോടെയാണ് പേര് മാറ്റേണ്ട സാഹചര്യം ഉണ്ടായത് എന്നും തിരഞ്ഞെടുപ്പ്  കമ്മീഷൻ തന്നെയാണ് പേര് മാറ്റാൻ നിർദേശിച്ചത് എന്നുമാണ് ഇടതുമുന്നണി പറയുന്നത്.

അഡ്വ വീണ എസ് നായരുടെ ഫെയ്സ്ബുക്ക് കുറിപ്പ്:

സഖാക്കൾ എന്റെ എല്ലാ പോസ്റ്റുകളുടെയും താഴെ എഴുതുന്ന ഒരു ക്യാപ്‌സ്യൂളുണ്ട്.

“ആദ്യം പോയി പേരിന്റെ വാല് മുറിച്ചിട്ട്  വാ.. എന്നിട്ട് നമുക്ക് മതേതരത്വം സംസാരിക്കാം”.

പേരിലല്ല, ചിന്തയിലാണ് ഒരു വ്യക്തിയുടെ യഥാർത്ഥ സൗന്ദര്യം എന്ന് വിശ്വസിക്കുന്ന വ്യക്തിയാണ് ഞാൻ. ഇ എം എസ് നമ്പൂതിരിപ്പാടിനോടും, എസ് രാമചന്ദ്രൻ പിള്ളയോടും എനിക്ക്‌ ബഹുമാനമേയുള്ളു 😄

N. B : ഇനി ഏതെങ്കിലും സഖാവിനു എന്റെ പേര്  മാറ്റണമെന്ന് തോന്നിയാൽ നാല് വോട്ടിനുവേണ്ടി മാറുന്ന ഈ പോസ്റ്ററുകൾ ഒന്ന് വായിച്ചു നോക്കണമെന്ന് അപേക്ഷിക്കുന്നു.