സിന്ധുമോൾ. ആർ
ന്യൂഡല്ഹി: കഴിഞ്ഞ 24 മണിക്കൂറിനുളളില് രാജ്യത്തെ 36,011 പേര്ക്ക് കൊവിഡ് സ്ഥിരീകരിച്ചതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. നിലവില് കൊവിഡ് ബാധിതരുടെ എണ്ണം 96 ലക്ഷം കടന്നിട്ടുണ്ട്. കൊവിഡ് രോഗികളുടെ എണ്ണം 50,000ത്തില് താഴെ റിപ്പോര്ട്ട് ചെയ്യുന്നത് ഇത് തുടര്ച്ചയായി 29-ാം ദിവസമാണ്.
ആകെ കൊവിഡ് ബാധിതരുടെ എണ്ണം 96,44,222 ആയിട്ടുണ്ട്. അതില് 4,03,248 പേര് സജീവ രോഗികളാണ്. 91,00,792 പേര് രോഗമുക്തരായി. 24 മണിക്കൂറിനുളളില് 482 മരണങ്ങളാണ് റിപോര്ട്ട് ചെയ്തത്. ആകെ മരണം 1,40,182 ആയി. ഡല്ഹിയില് രോഗബാധ കുറഞ്ഞിട്ടുണ്ട്. ഇതുവരെ 5,53,292 പേര്ക്കാണ് കൊവിഡ് സ്ഥിരീകരിച്ചത്. ഇതുവരെ 9,574 പേര്ക്ക് ജീവന് നഷ്ടപ്പെട്ടു.
പശ്ചിമബംഗാളില് 3,175 പേര്ക്ക് ഇന്ന് കൊവിഡ് സ്ഥിരീകരിച്ചു. 3,207 പേര് രോഗമുക്തരായി. 49 പേര് മരിച്ചു. ഹിമാചല് പ്രദേശില് പുതുതായി 905 പേര്ക്കാണ് കൊവിഡ് സ്ഥിരീകരിച്ചത്. 945 പേര് രോഗമുക്തരായി. 24 മണിക്കൂറിനുള്ളില് 13 പേര് മരിച്ചു. ഹിമാചല്പ്രദേശില് ആകെ രോഗബാധിതര് 44,405 ആയി. ഏതാനും ആഴ്ചയ്ക്കുള്ളില് കൊവിഡ് വാക്സിന് രാജ്യത്ത് വിതരണത്തിന് തയ്യാറാവുമെന്ന് പ്രധാനമന്ത്രി മോദി ഇന്ന് നടന്ന രാഷ്ട്രീയപാര്ട്ടികളുടെ യോഗത്തില് പറഞ്ഞു. ശാസ്ത്രജ്ഞര് പച്ചക്കൊടി കാണിച്ചാല് ഉടന് വാക്സിന് വിതരണം തുടങ്ങുമെന്നാണ് സൂചന.