ദുബൈ: യു.എ.ഇയില്നിന്നുള്ള യാത്രക്കാര്ക്ക് സൗദി അറേബ്യ അപ്രതീക്ഷിത വിലക്ക് പ്രഖ്യാപിച്ചതോടെ നൂറുകണക്കിന് മലയാളികളും മറ്റ് രാജ്യക്കാരും കുടുങ്ങി. ഇന്ത്യയില്നിന്ന് സൗദിയിലേക്ക് നേരിട്ട് യാത്രാവിലക്കുള്ളതിനാല് യു.എ.ഇ വഴി യാത്രചെയ്യാനെത്തിയവരാണ് ദുരിതത്തിലായത്. ദുബൈ, ഷാര്ജ എന്നിവിടങ്ങളിലാണ് കൂടുതല് മലയാളികളും തങ്ങുന്നത്. റോഡ് മാര്ഗം പോകാന് ശ്രമിച്ചവരെ അതിര്ത്തിയില് തടഞ്ഞു. എന്നുവരെയാണ് യാത്രാവിലക്ക് എന്ന് വ്യക്തമാക്കാത്തതിനാല് ഇവര് അനിശ്ചിതാവസ്ഥയിലാണ്.
സൗദി, കുവൈത്ത് എന്നിവിടങ്ങളിലേക്ക് യാത്രചെയ്യുന്നവര് യു.എ.ഇയില് 14 ദിവസം ക്വാറന്റീനില് കഴിയണമെന്ന് നിബന്ധനയുണ്ടായിരുന്നു. ഇതു പ്രകാരമാണ് മലയാളികള് അടക്കമുള്ളവര് യു.എ.ഇയില് എത്തിയത്. 60,000 മുതല് ലക്ഷം രൂപ വരെയുള്ള പാക്കേജിലാണ് യു.എ.ഇയില് എത്തിയത്. യു.എ.ഇയിലേക്കും ഇവിടെനിന്ന് സൗദിയിലേക്കുമുള്ള ടിക്കറ്റ്, 15 ദിവസത്തെ താമസം, ഭക്ഷണം, വിസ, കോവിഡ് ടെസ്റ്റ് എന്നിവ പാക്കേജില് ഉള്പെട്ടിരുന്നു.
പലരുടെയും പാക്കേജിെന്റ കാലാവധി ഇന്ന് അവസാനിച്ചു. ഇവര് ഇന്നു മുതല് സ്വന്തമായി വാടക നല്കി ഹോട്ടലില് മുറിയെടുക്കേണ്ടി വരും. ഭക്ഷണച്ചെലവ് വേറെയും. ദുബൈയില് തങ്ങണമെങ്കില് ദിവസവും നല്ലൊരു തുക ചെലവാകും. യു.എ.ഇയിലെ വിസിറ്റിങ് വിസയുടെ കാലാവധി അവസാനിക്കുമെന്ന ആശങ്കയുമുണ്ട്. എത്ര ദിവസത്തേക്കാണ് വിലക്ക് എന്ന് അറിയാത്തതിനാല് നാട്ടിലേക്ക് മടങ്ങാനാണ് പലരുടെയും തീരുമാനം. ഉടന് തിരിച്ചെത്തിയില്ലെങ്കില് സൗദി വിസയുടെയും ഇഖാമയുടെയും കാലാവധി കഴിയുന്നവരുമുണ്ട്. കുവൈത്തിലേക്ക് യാത്രചെയ്യേണ്ടവരും യു.എ.ഇയില് തങ്ങുന്നുണ്ട്. കുവൈത്തും വിലക്കേര്പ്പെടുത്തുമോ എന്ന ആശങ്കയിലാണിവര്.