ന്യൂഡല്ഹി: പ്രവാസി ഇന്ത്യക്കാരുടെ ചിരകാല സ്വപ്നമായിരുന്ന പോസ്റ്റല് ബാലറ്റിന് പൂര്ണ പിന്തുണ അറിയിച്ച് തെരഞ്ഞെടുപ്പ് കമ്മിഷന്. പ്രവാസി വോട്ടിനായി സുപ്രീംകോടതിയില് പൊതുതാത്പര്യ ഹര്ജി നല്കിയ ഡോ. ഷംഷീര് വയലിലുമായി നടത്തിയ കൂടിക്കാഴ്ചയില് മുഖ്യതിരഞ്ഞെടുപ്പ് കമ്മിഷണര് സുനില് അറോറയാണ് ഇക്കാര്യം വ്യക്തമാക്കിയത്.
പ്രവാസികള്ക്ക് ഇലക്ട്രോണിക്കായി ലഭ്യമാക്കിയ പോസ്റ്റല് ബാലറ്റിലൂടെ വിദേശത്തുനിന്ന് വോട്ടുചെയ്യാനുള്ള സൗകര്യം എത്രയും വേഗം ഉറപ്പാക്കുന്നത് സജീവപരിഗണനയിലാണെന്ന് കമ്മിഷന് വാര്ത്താക്കുറിപ്പും ഇറക്കി. ഇത് സംബന്ധിച്ച് നിയമ, വിദേശകാര്യ മന്ത്രാലയങ്ങളുമായി ആശയവിനിമയം നടത്തി വരുകയാണെന്നും കമ്മിഷന് വ്യക്തമാക്കി.
അതെ സമയം കമ്മിഷന്റെ നീക്കം പ്രതീക്ഷ നല്കുന്നതാണെന്നും ഈ വര്ഷം നടക്കുന്ന നിയമസഭാതിരഞ്ഞെടുപ്പുകളില് പ്രവാസി പോസ്റ്റല് ബാലറ്റ് നടപ്പാക്കുമെന്ന് പ്രതീക്ഷിക്കുന്നതായും ഡോ. ഷംഷീര് വയലില് പറഞ്ഞു. ഗള്ഫ് രാജ്യങ്ങളിലെ പ്രവാസികളെ ആദ്യഘട്ടത്തില്നിന്ന് ഒഴിവാക്കാന് പറയുന്ന വാദങ്ങള് വസ്തുതാപരമായി ശരിയല്ലെന്ന് മുഖ്യ തിരഞ്ഞെടുപ്പ് കമ്മിഷണറുമായുള്ള ചര്ച്ചയില് അദ്ദേഹം പറഞ്ഞു. നാട്ടിലെത്താതെ വോട്ട് ചെയ്യാനുള്ള സൗകര്യങ്ങള് ഒരുക്കാന് ഗള്ഫ് രാജ്യങ്ങളില് നിലവില് അനുമതിയുള്ളതിനാല് വിദേശകാര്യമന്ത്രാലയം ഉന്നയിച്ചിട്ടുള്ള ആശങ്കയില് അടിസ്ഥാനമില്ലെന്ന് ഷംഷീര് ചൂണ്ടിക്കാട്ടി .18,22,173 ഫിലിപ്പീന്സ് സ്വദേശികള് യു.എ.ഇ.യില് നിന്നു വോട്ട് ചെയ്യാന് രജിസ്റ്റര് ചെയ്തിട്ടുള്ളതും അദ്ദേഹം പറഞ്ഞു .