കേരളത്തിലേക്ക് 48,960 ഡോസ് വാക്‌സിനുകൾ കൂടി എത്തിച്ച് കേന്ദ്രം

തിരുവനന്തപുരം: സംസ്ഥാനത്തെ കൊറോണ പ്രതിരോധ പ്രവർത്തനങ്ങൾക്കായി കേന്ദ്രസർക്കാർ 48,960 ഡോസ് വാക്‌സിനുകൾ കൂടി എത്തിച്ചു നൽകി. ഭാരത് ബയോടെക്കിന്റെ കൊവാക്‌സിനാണ് എത്തിയത്. തിരുവനന്തപുരത്ത് 16,640 ഡോസ് വാക്‌സിനുകളും എറണാകുളത്ത് 19,200 ഡോസ് വാക്‌സിനുകളും കോഴിക്കോട് 13,120 ഡോസ് വാക്‌സിനുകളുമാണ് എത്തിയത്. ഇത് കൂടാതെ കൂടുതൽ ഡോസ് അടുത്ത ദിവസങ്ങളിൽ എത്തിക്കുമെന്ന് കേന്ദ്ര ആരോഗ്യ വകുപ്പ് അറിയിച്ചു.

കേരളത്തിലേക്ക് 21 ലക്ഷം വാക്‌സിൻ ഡോസുകൾ മാർച്ച് ഒൻപതിന് മുൻപ് എത്തിയ്ക്കുമെന്ന് കേന്ദ്ര ആരോഗ്യമന്ത്രാലയം ഉറപ്പ് നൽകിയതായി കഴിഞ്ഞ ദിവസം മുഖ്യമന്ത്രി പിണറായി വിജയൻ അറിയിച്ചിരുന്നു. സർക്കാർ ആശുപത്രികൾ, സർക്കാർ നിശ്ചയിക്കുന്ന സ്വകാര്യ ആശുപത്രികൾ, പൊതു കെട്ടിടങ്ങൾ എന്നിവിടങ്ങളിലായി 1000 ത്തോളം കേന്ദ്രങ്ങളിലാണ് നിലവിൽ വാക്‌സിൻ നൽകുന്നത്.

സംസ്ഥാനത്ത് ഘട്ടം ഘട്ടമായി കൊറോണ വാക്‌സിനേഷൻ സെന്ററുകളുടെ എണ്ണം വർദ്ധിപ്പിക്കാൻ തീരുമാനിച്ചിട്ടുണ്ട്. വാക്‌സിനെടുക്കാൻ നേരിട്ട് വരുന്നവർക്ക് ടോക്കൺ സംവിധാനം ഏർപ്പെടുത്തും. വാക്‌സിൻ സംബന്ധമായ സംശയങ്ങൾക്ക് ദിശ 1056,0475 2552056 എന്നീ നമ്പറുകളിലേക്ക് വിളിക്കാമെന്നും ആരോഗ്യ വകുപ്പ് അറിയിച്ചു.