ചേമഞ്ചേരി കുഞ്ഞിരാമൻ നായരുടെ വിയോഗം; പ്രധാനമന്ത്രി അനുശോചനം രേഖപ്പെടുത്തി

ന്യൂഡൽഹി: കഥകളി ആചാര്യൻ ഗുരു ചേമഞ്ചേരി കുഞ്ഞിരാമൻ നായരുടെ നിര്യാണത്തിൽ പ്രധാനമന്ത്രി നരേന്ദ്ര മോദി ദു:ഖം രേഖപ്പെടുത്തി. ചേമഞ്ചേരി കുഞ്ഞിരാമൻ നായരുടെ നിര്യാണത്തിൽ ദു:ഖിതനാണെന്ന് പ്രധാനമന്ത്രി പറഞ്ഞു. ട്വിറ്ററിലൂടെയായിരുന്നു പ്രധാനമന്ത്രിയുടെ പ്രതികരണം.

ഇന്ന് പുലർച്ചെയോടെ കൊയിലാണ്ടിയിലെ വീട്ടിൽ വെച്ചാണ് ചേമഞ്ചേരി കുഞ്ഞിരാമൻ നായരുടെ മരണം സംഭവിച്ചത്. 105 വയസായിരുന്നു. 2017ൽ രാജ്യം അദ്ദേഹത്തിന് പദ്മശ്രീ നൽകി ആദരിച്ചിരുന്നു. ക്ലാസിക് കലാരൂപങ്ങളിൽ ഭാരതത്തിലെ ഏറ്റവും പ്രായം ചെന്ന കലാകാരനായിരുന്നു അദ്ദേഹം.