![“Manju”](https://santhigirinews.org/wp-content/uploads/2020/04/YOUTUBE.jpg")
ശ്രീജ.എസ്‌
ന്യൂഡല്‍ഹി: ട്രക്ക് ഓടിച്ചപ്പോള്‍ ഹെല്‍മറ്റ് ധരിച്ചില്ലെന്ന കാരണത്താല്‍ ഡ്രൈവര്‍ക്ക് പിഴ ചുമത്തിയത് 1000 രൂപ. ഒഡിഷയിലെ ഗഞ്ചാം ജില്ലയിലാണ് സംഭവം. പ്രമോദ് കുമാര്‍ സ്വയിന്‍ എന്നയാള്‍ ട്രക്ക് ഓടിക്കാനുള്ള പെര്‍മിറ്റ് പുതുക്കാനായി ആര്‍.ടി ഓഫിസിലെത്തിയപ്പോഴാണ് സംഭവം പുറത്തറിയുന്നത്.
പ്രമോദിന്റെ പേരില്‍ ഒരു ചെല്ലാന്‍ അടക്കാനുണ്ടെന്ന് ആര്‍.ടി ഓഫിസ് അറിയിപ്പ് നല്‍കിയിരുന്നു. ഹെല്‍മറ്റില്ലാതെ ട്രക്ക് ഓടിച്ചുവെന്നാണ് കുറ്റം. പിഴത്തുക അടച്ചതിന് ശേഷമാണ് ഇദ്ദേഹത്തിന് പെര്‍മിറ്റ് അനുവദിച്ചത്.
‘കഴിഞ്ഞ മൂന്നുവര്‍ഷമായി ട്രക്ക് ഓടിക്കുകയാണ്. കുടിവെള്ള വിതരണമാണ് ജോലി. പെര്‍മിറ്റിന്റെ കാലാവധി അവസാനിച്ചപ്പോള്‍ പുതുക്കാന്‍ എത്തിയതായിരുന്നു ആര്‍.ടി ഓഫിസില്‍. എന്നാല്‍ ഒരു പിഴത്തുക അടക്കാനുണ്ടെന്നായിരുന്നു മറുപടി.
ഹെല്‍മറ്റില്ലാതെ ട്രക്ക് ഓടിച്ചുവെന്നാണ് പരാതി’ -പ്രമോദ് കുമാര്‍ വെളിപ്പെടുത്തി. അധികൃതര്‍ അനാവശ്യമായി ആളുകളെ അപമാനിച്ച്‌ പണം തട്ടിയെടുക്കുകയാണ്. ഇത്തരം തെറ്റുകള്‍ പരിഹരിക്കാന്‍ സര്‍ക്കാര്‍തലത്തില്‍ നടപടി സ്വീകരിക്കണമെന്നും അദ്ദേഹം കൂട്ടിച്ചേര്‍ത്തു.
