ന്യൂഡല്ഹി: തെരഞ്ഞെടുപ്പ് അടുത്തിരിക്കെ അന്താരാഷ്ട്ര വിപണിയിലെ എണ്ണവില കുറവിന്റെ ആനുകൂല്യം ജനങ്ങള്ക്ക് നല്കുമെന്ന് പ്രഖ്യാപിച്ച് കമ്പനികള്. കഴിഞ്ഞ കുറേ ദിവസങ്ങളായി ആഗോള വിപണിയില് ഏകദേശം പത്ത് ശതമാനത്തോളം എണ്ണവില കുറഞ്ഞിരുന്നു. ഇതിന്റെ ആനുകൂല്യം സാധാരണ ജനങ്ങള്ക്ക് നല്കുമെന്നാണ് പ്രഖ്യാപനം. എന്നാല്, നേരത്തെ ആഗോള വിപണിയില് എണ്ണവില കുറഞ്ഞപ്പോള് കമ്പനികള് മൗനം പാലിക്കുകയായിരുന്നു .
ഇന്ത്യ ഉപയോഗിക്കുന്ന ബ്രെന്റ് ക്രൂഡിന്റെ വില അന്താരാഷ്ട്ര വിപണിയില് 63 ഡോളറാണ്. 70 ഡോളര് വരെ ഉയര്ന്ന ശേഷമാണ് വില ഇടിഞ്ഞത്.യുറോപ്യന്റെ വിവിധ ഭാഗങ്ങളും വീണ്ടും കോവിഡ് പടരുന്നതോടെ എണ്ണവില വീണ്ടും കുറയാനാണ് സാധ്യത. ഇത് മുന്നില് കണ്ടാണ് കമ്പനികള് വിലകുറവിന്റെ ആനുകൂല്യം ജനങ്ങള്ക്ക് നല്കാന് പദ്ധതിയിടുന്നത് . അതെ സമയം, ഇതാദ്യമായല്ല തെരഞ്ഞെടുപ്പ് കാലത്ത് എണ്ണകമ്പനികള് വില കുറവിന്റെ ആനുകൂല്യം ജനങ്ങള്ക്ക് നല്കുന്നത്. മുമ്പും വിവിധ സംസ്ഥാനങ്ങളില് തെരഞ്ഞെടുപ്പ് പ്രഖ്യാപിച്ചപ്പോള് കേന്ദ്രം ഭരിക്കുന്ന ബി.ജെ.പി സര്ക്കാറിനെതിരായ ജനരോഷം മാറ്റാന് കമ്പനികള് വില കുറച്ചിരുന്നു.