തിരുവനന്തപുരം: സംസ്ഥാനത്ത് എസ്.എസ്.എല്.സി, പ്ലസ് ടു പരീക്ഷകള് ഇന്ന് ആരംഭിക്കും. വെള്ളിയാഴ്ച തുടങ്ങുന്ന വി.എച്ച്.എസ്.ഇ.യില് അടക്കം മൂന്നുവിഭാഗങ്ങളിലുമായി ഒമ്പതുലക്ഷത്തോളം വിദ്യാര്ഥികള് പരീക്ഷയെഴുതും. ഇന്ന് രാവിലെ പ്ലസ് ടു പരീക്ഷയും ഉച്ചയ്ക്ക് എസ്എസ്എല്സി പരീക്ഷയും നടക്കും. എസ്എസ്എല്സി പരീക്ഷ ഇന്ന് മുതല് ഏപ്രില് 12വരെ ഉച്ചക്ക് ശേഷവും ഏപ്രില് 15 മുതല് രാവിലെയുമാണ് നടക്കുക.
റംസാന് നോമ്പ് പരിഗണിച്ചാണ് ഈ മാസം 15 മുതല് എസ്എസ്എല്സി പരീക്ഷ രാവിലേയ്ക്കു മാറ്റുന്നത്. ഇന്ന് മുതല് 12 വരെ ഉച്ചയ്ക്ക് 1.40 മുതലാണ് പരീക്ഷ ആരംഭിക്കുക. വെള്ളിയാഴ്ച 2.40 മുതലുമാണ് പരീക്ഷ നടക്കുക. ഏപ്രില് 15 മുതല് രാവിലെ 9.40ന് പരീക്ഷ ആരംഭിക്കും. 29നാണ് എസ്എസ്എല്സി വിഭാഗത്തിലെ അവസാന പരീക്ഷ.
എസ്.എസ്.എല്.സി. പരീക്ഷ 29നും ഹയര്സെക്കന്ഡറി, വി.എച്ച്.എസ്.ഇ. പരീക്ഷകള് 26നും അവസാനിക്കും. 2947 കേന്ദ്രങ്ങളിലായി 4,22,226 പേരാണ് എസ്.എസ്.എല്.സി. പരീക്ഷയെഴുതുന്നത്. ഇതില് 2,15,660 പേര് ആണ്കുട്ടികളും 2,06,566 പേര് പെണ്കുട്ടികളുമാണ്. ഗള്ഫില് ഒമ്പതുകേന്ദ്രങ്ങളിലായി 573ഉം ലക്ഷദ്വീപില് ഒമ്പതുകേന്ദ്രങ്ങളിലായി 627ഉം പേര് പരീക്ഷയെഴുതുന്നുണ്ട്. 2004 കേന്ദ്രങ്ങളിലായി 4,46,471 പേരാണ് ഹയര്സെക്കന്ഡറി പരീക്ഷയെഴുതുന്നത്. ഇതില് 2,26,325 പേര് ആണ്കുട്ടികളും 2,20,146 പേര് പെണ്കുട്ടികളുമാണ്. 27,000 വിദ്യാര്ഥികളാണ് വി.എച്ച്.എസ്.ഇ. പരീക്ഷയെഴുതുന്നത്. കൊവിഡ് പശ്ചാത്തലത്തില് കര്ശന മുന്നൊരുക്കങ്ങളോടെയാണ് പരീക്ഷ നടക്കുന്നത്.