കാഠ്മണ്ഡു: എവറസ്റ്റിൽ വീണ്ടും കോവിഡ് സ്ഥിരീകരിച്ചു. മൂന്ന് പർവതാരോഹകർക്കും ഒരു ഗൈഡിനുമാണ് രോഗം ബാധിച്ചത്. ബേസ് ക്യാംപിൽ വച്ച് നടത്തിയ പരിശോധനയിലാണ് രോഗം സ്ഥിരീകരിച്ചത്. നേരത്തെ, ഏപ്രിലിലും എവറസ്റ്റിൽ ഒരാൾക്ക് കോവിഡ് സ്ഥിരീകരിച്ചിരുന്നു.
ഒരിക്കലും കോവിഡ് എത്താത്ത പ്രദേശമായിട്ടാണ് നേപ്പാൾ സർക്കാർ എവറസ്റ്റിനെ വിശേഷിപ്പിച്ചിരുന്നത്. കോവിഡ് ബാധിച്ചതിനെ തുടർന്ന് 30 ഓളം ആളുകളെ ബേസ് ക്യാംപിൽ നിന്നും ഒഴിപ്പിച്ചതായി പോളിഷ് പർവതാരോഹകൻ പവൽ മിച്ചൽസ്കി കഴിഞ്ഞയാഴ്ച വെളിപ്പെടുത്തിയിരുന്നു.
എന്നാൽ ബേസ് ക്യാംപിൽ ആർക്കും കോവിഡ് ബാധിച്ചിട്ടില്ലെന്നാണ് നേപ്പാൾ സർക്കാർ പറയുന്നത്. ബേസ് ക്യാംപിൽ എത്തണമെങ്കിൽ 72 മണിക്കൂർ മുൻപ് കോവിഡ് ടെസ്റ്റ് ചെയ്യണമെന്നാണ് നിയമം.