ന്യൂഡല്ഹി : ഹമാസ് തീവ്രവാദികളുടെ റോക്കറ്റ് ആക്രമണത്തില് മരിച്ച സൗമ്യ സന്തോഷിന്റെ കുടുംബത്തെ സംരക്ഷിക്കുമെന്ന് വ്യക്തമാക്കി ഇസ്രായേല് . ഇസ്രായേല് എംബസ്സിയുടെ ഇന്ത്യയിലെ ഡെപ്യൂട്ടി അംബാസിഡര് റോണി യദീദിയ ക്ലീന് ആണ് ഇക്കാര്യം അറിയിച്ചത് . ‘സംഭവിച്ചതിനുള്ള നഷ്ടപരിഹാരമെന്ന നിലയില് കുടുംബത്തെ ഇസ്രയേലി അധികൃതര് സംരക്ഷിക്കും. ഒരു അമ്മയുടെയും ഭാര്യയുടെയും നഷ്ടത്തിന് ഒന്നും പകരമാകില്ലെങ്കിലും’- ക്ലീന് വ്യക്തമാക്കി.
വെള്ളിയാഴ്ചയോ, ശനിയാഴ്ചയോ സൗമ്യ സന്തോഷിന്റെ മൃതദേഹം വിമാനത്തില് ഡല്ഹിയില് എത്തിച്ചശേഷം നാട്ടിലേക്ക് കൊണ്ടുവരുമെന്ന് അവര് കൂട്ടിച്ചേര്ത്തു. പലസ്തീനുമായുള്ള സംഘര്ഷത്തിനിടയില് ഇസ്രയേലില് പൗരന്മാര്ക്കും ഇന്ത്യക്കാര്ക്കും നല്കുന്ന സംരക്ഷണത്തില് വേര്തിരിവുണ്ടാകില്ലെന്നും ക്ലീന് പറഞ്ഞു.
ചൊവ്വാഴ്ചയാണ് 31-കാരിയായ സൗമ്യ സന്തോഷ് അഷ്കെലോണില് കൊല്ലപ്പെട്ടത്. ഇടുക്കി കീരിത്തോട്ട് സ്വദേശിയായ സൗമ്യ ഏഴ് വര്ഷമായി ഇസ്രയേലില് കെയര് ടേക്കറായി ജോലി നോക്കുകയായിരുന്നു.