നാഗ്പൂര്: 139 യാത്രക്കാരുമായി ബംഗളൂരുവില് നിന്ന് പട്നയിലേക്ക് പറന്നുയര്ന്ന ഗോ എയര് വിമാനം നാഗ്പൂരില് അടിയന്തരമായി നിലത്തിറക്കി. വിമാനത്തിന്റെ എന്ജിനുകളിലൊന്നില് തകരാര് ശ്രദ്ധയില്പ്പെട്ടതിനെ തുടര്ന്നാണ് അടിയന്തര ലാന്ഡിങ്.
11.15 ഓടെ വിമാനം സുരക്ഷിതമായി നിലത്തിറക്കിയതായി ഔദ്യോഗിക പ്രസ്താവനയില് അറിയിച്ചു. ഗോ എയര് ജി 8-873 വിമാനമാണ് ബംഗളൂരുവില് നിന്ന് പട്നയിലേക്ക് പറന്നത്. എന്ജിന് തകരാര് കണ്ടെത്തിയതിനെ തുടര്ന്ന് നാഗ്പൂര് വഴി തിരിച്ചുവിട്ടു. സ്റ്റാന്ഡേര്ഡ് ഓപ്പറേറ്റിങ് നടപടിക്രമങ്ങള് പാലിച്ച ക്യാപ്റ്റന് വിമാനം സുരക്ഷിതമായി നാഗ്പൂര് വിമാനത്താവളത്തില് ഇറക്കി -പ്രസ്താവനയില് പരാമര്ശിക്കുന്നു.
മുഴുവന് യാത്രക്കാര്ക്കും ആവശ്യമായ സഹായങ്ങള് ചെയ്തതായി കമ്പനി അറിയിച്ചു. വൈകുന്നേരം 4.45ന് യാത്രക്കാര്ക്കായി പ്രത്യേക വിമാന സര്വിസ് ക്രമീകരിച്ചു. എന്ജിനീയറിങ് സംഘം വിമാനത്തിന്റെ തകരാര് പരിശോധിച്ചു വരികയാണെന്നും ഗോ എയര് അറിയിച്ചു.