![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: കോവിഡ് വ്യാപന സാഹചര്യം കണക്കിലെടുത്ത് ജൂണ്‍ 16ന് നടത്താന്‍ തീരുമാനിച്ചിരുന്ന എയിംസ്, ജിപ്മര്‍, പിജിമെര്‍, നിംഹാന്‍സ് എന്നിവിടങ്ങളിലെ ബിരുദാനന്തര മെഡിക്കല്‍ കോഴ്സുകളിലേക്കുള്ള പ്രവേശന പരീക്ഷമാറ്റിവെക്കാന്‍ സുപ്രീംകോടതി നിര്‍ദേശം. ഒരു മാസത്തേക്ക് പരീഷ മാറ്റിവെക്കാനാണ് കോടതി ഉത്തരവിട്ടിരിക്കുന്നത്.
ജസ്റ്റിസുമാരായ ഇന്ദിര ബാനര്‍ജി, എം.ആര്‍. ഷാ എന്നിവരടങ്ങിയ അവധിക്കാല ഡിവിഷന്‍ ബെഞ്ചാണ് ഹര്‍ജികള്‍ പരിഗണിച്ചത്. നാഷണല്‍ ഇന്‍പോര്‍ട്ടന്‍സ് കംബൈന്‍ഡ് എന്‍ട്രന്‍സ് ടെസ്റ്റ് (ഐ.എന്‍.ഐ-സി.ഇ.ടി) മാറ്റിവെക്കാന്‍ ഉത്തരവിടണമെന്ന് ആവശ്യപ്പെട്ട് രണ്ട് ഹര്‍ജികളാണ് സമര്‍പ്പിച്ചിരുന്നത്. 23 എം.ബി.ബി.എസ് ഡോക്ടര്‍മാരും ഇന്ത്യന്‍ മെഡിക്കല്‍ അസോസിയേഷന്‍, മെഡിക്കല്‍ സ്റ്റുഡന്‍റ് നെറ്റ് വര്‍ക് (ചത്തീസ്ഗഡ് ചാപ്റ്റര്‍) എന്നിവരെ കൂടാതെ കോവിഡ് ഡ്യൂട്ടി ചെയ്യുന്ന 35 ഡോക്ടര്‍മാരും ഹര്‍ജി നല്‍കിയിരുന്നു.
