ന്യൂഡല്ഹി : കോവിഡ് വാക്സിന്റെ രണ്ട് ഡോസുകള് തമ്മിലുള്ള ഇടവേള കുറക്കുന്നത് ഫലപ്രാപ്തി വര്ധിപ്പിക്കുമെന്ന റിപ്പോര്ട്ടുകള് കഴിഞ്ഞ ദിവസം പുറത്ത് വന്നിരുന്നു. ഇതിന്റെ പശ്ചാത്തലത്തില് വാക്സിന്റെ ഇടവേള സംബന്ധിച്ച് പുതിയ തീരുമാനവുമായി എത്തിയിരിക്കുകയാണ് കേന്ദ്ര സര്ക്കാര്.
സിറം ഇന്സ്റ്റിറ്റ്യൂട്ട് നിര്മിക്കുന്ന കോവിഷീല്ഡ് വാക്സിന്റെ രണ്ട് ഡോസുകള് തമ്മിലുള്ള ഇടവേളയില് അടിയന്തരമായി മാറ്റം വരുത്തേണ്ട സാഹചര്യമില്ലെന്ന് കേന്ദ്രസര്ക്കാര് അറിയിച്ചു. ശാസ്ത്രീയമായ പഠനങ്ങള് നടത്തിയതിന് ശേഷം മാത്രമേ കോവിഷീല്ഡ് വാക്സിന് ഇടവേളയില് മാറ്റം വരുത്തുന്നതിനെ കുറിച്ച് തീരുമാനിക്കുകയുള്ളുവെന്നും കേന്ദ്രം അറിയിച്ചു.
അടിയന്തരമായി വാക്സിന് ഇടവേളയില് മാറ്റം വരുത്തില്ല. പരമാവധി ജനങ്ങള്ക്ക് ഒരു ഡോസ് വാക്സിനെങ്കിലും നല്കുകയെന്ന ലക്ഷ്യത്തോടെയാണ് ഇടവേള വര്ധിപ്പിച്ചത്. ഇതുമൂലം നിരവധി പേര്ക്ക് വാക്സിന്റെ സംരക്ഷണം നല്കാനായെന്നും നീതി ആയോഗ് അംഗം വി.കെ പോള് പറഞ്ഞു.