അഫ്ഗാന് പ്രതിസന്ധി: മോദി പുടിനുമായി ചര്ച്ച നടത്തി
ന്യൂഡല്ഹി: പ്രധാനമന്ത്രി നരേന്ദ്ര മോദി റഷ്യന് പ്രസിഡന്റ് വ്ലാഡമീര് പുടിനുമായി ചര്ച്ച നടത്തി. അഫ്ഗാനില് താലിബാന് അധികാരം പിടിച്ചതിനെ തുടര്ന്ന് ഉടലെടുത്ത പ്രതിസന്ധിയായിരുന്നു പ്രധാന ചര്ച്ച വിഷയം. ഇരു രാഷ്ട്രനേതാക്കളും 45 മിനിറ്റോളം സംസാരിച്ചു.
അഫ്ഗാനിസ്താനില് സുരക്ഷയും സമാധാനവും ഉറപ്പു വരുത്തേണ്ടതിന്റെ ആവശ്യകതയെ കുറിച്ച് ഇരുവരും സംസാരിച്ചുവെന്നാണ് റിപ്പോര്ട്ട്. അഫ്ഗാനില് കുടുങ്ങിപ്പോയവരെ പുറത്തെത്തിക്കുന്നതിനാണ് ഇപ്പോള് പ്രാധാന്യം നല്കേണ്ടതെന്നും ഇരു നേതാക്കളും പറഞ്ഞതായും പ്രധാനമന്ത്രിയുടെ ഓഫീസ് പുറത്തിറക്കിയ പ്രസ്താവനയില് വ്യക്തമാക്കി.
യു.കെ കാലാവസ്ഥ കോണ്ഫറന്സ്, യു.എന് സുരക്ഷാസമിതി എന്നിവിടങ്ങളില് സ്വീകരിക്കേണ്ട നിലപാടും ഇരു രാഷ്ട്രതലവന്മാരും ചര്ച്ച ചെയ്തു. നേരത്തെ ജര്മ്മന് ചാന്സിലറുമായും പ്രധാനമന്ത്രി ടെലിഫോണ് സംഭാഷണം നടത്തിയിരുന്നു.