വനിത മത്സ്യവിപണന തൊഴിലാളികള്ക്കായി സൗജന്യ ബസ് സര്വീസ്
തിരുവനന്തപുരം: വനിത മത്സ്യവിപണന തൊഴിലാളികള്ക്കായി ഫിഷറീസ് വകുപ്പും കെ. എസ്. ആര്. ടി. സിയും സംയുക്തമായി സമുദ്ര എന്ന പേരില് സൗജന്യ ബസ് സര്വീസ് ആരംഭിക്കുന്നു. ഇതിന്റെ ഉദ്ഘാടനം ഇന്ന് (ആഗസ്റ്റ് 28) രാവിലെ 11.30ന് പാളയം മാര്ക്കറ്റിന് മുന്നില് മുഖ്യമന്ത്രി പിണറായി വിജയന് നിര്വഹിക്കും. ഗതാഗത മന്ത്രി ആന്റണി രാജു അധ്യക്ഷത വഹിക്കും. മന്ത്രിമാരായ സജി ചെറിയാന്, വി. ശിവന്കുട്ടി, ജി. ആര്. അനില് എന്നിവര് പങ്കെടുക്കും
മത്സ്യത്തൊഴിലാളി സ്ത്രീകള് വിപണനത്തിനായി പോകുമ്പോള് നേരിടുന്ന യാത്രക്ലേശത്തിന് പരിഹാരം കാണുന്നതിനായാണ് പദ്ധതി ആരംഭിക്കുന്നത്. മൂന്ന് ലോഫ്ളോര് ബസുകളാണ് കെ. എസ്. ആര്. ടി. സി ഇതിനായി തയ്യാറാക്കിയിരിക്കുന്നത്. ഫിഷിംഗ് ഹാര്ബറുകളില് നിന്ന് തിരുവനന്തപുരത്തെ വിവിധ കച്ചവട കേന്ദ്രങ്ങളിലേക്ക് രാവിലെ ആറു മുതല് 10 വരെയുള്ള സമയത്താണ് സര്വീസുകള് നടത്തുക.
24 പേര്ക്ക് ഒരു ബസില് യാത്ര ചെയ്യാന് കഴിയും. മത്സ്യക്കൊട്ടകള് സൗകര്യപ്രദമായി പുറത്തു നിന്ന് ലോഡ് ചെയ്യാവുന്ന വിധത്തിലുള്ള റോള് പ്ളാറ്റ്ഫോം, ക്യാമറയിലൂടെ നിരീക്ഷിച്ച് ഡ്രൈവര് ഓപ്പറേറ്റ് ചെയ്യുന്ന ഡോറുകള്, മ്യൂസിക്ക് സിസ്റ്റം, റിയര് ക്യാമറ എന്നീ സൗകര്യങ്ങളും ഒരുക്കിയിട്ടുണ്ട്.