![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: ഇന്ത്യയില്‍ ഡിജിറ്റല്‍ കറന്‍സി അവതരിപ്പിക്കാനുള്ള തയ്യാറെടുപ്പിലാണ് റിസര്‍വ് ബാങ്ക്. സെന്‍ട്രല്‍ ബാങ്ക് ഡിജിറ്റല്‍ കറന്‍സി (സി.ബി.ഡി.സി) എന്നറിയപ്പെടുന്ന ഇവ ഡിസംബറോടെ അവതരിപ്പിക്കുമെന്നാണ് വിവരം. ബിറ്റ്കോയിന്‍ അടക്കമുള്ള മുന്‍ നിര ക്രിപ്റ്റോ കറന്‍സികള്‍ ആധിപത്യം സ്ഥാപിക്കുന്നതിന് മുമ്പുതന്നെ നിരവധി ധനകാര്യ സ്ഥാപനങ്ങള്‍ ഔദ്യോഗികമായി അംഗീകരിക്കപ്പെടുന്നതും സമ്പദ്വ്യവസ്ഥയുടെ ഭാഗമായതുമായ ഡിജിറ്റല്‍ കറന്‍സി കൊണ്ടുവരികയെന്ന ആശയം മുന്നോട്ടുവെച്ചിരുന്നു.
രാജ്യത്ത് സി.ബി.ഡി.സിയുടെ അവതരണം സാമ്പത്തിക മേഖലയില്‍ പുത്തന്‍ ചുവടുവെപ്പിനുള്ള തുടക്കമാകുമെന്നാണ് വിലയിരുത്തല്‍ . രാജ്യത്ത് പരമ്പരാഗത ബാങ്കിങ് രീതികളെ പൊളിച്ചെഴുതി നവീന ബാങ്കിങ് സാധ്യതകള്‍ ആവിഷ്കരിക്കുകയെന്നതാണ് ആര്‍ ബി ഐ ലക്ഷ്യമിടുന്നത് . ഡിസംബറോടെ ഡിജിറ്റല്‍ കറന്‍സി പരീക്ഷണാടിസ്ഥാനത്തില്‍ പുറത്തിറക്കുമെന്ന് ആര്‍.ബി.ഐ ഗവര്‍ണര്‍ ശക്തികാന്ത ദാസ് അറിയിച്ചിരുന്നു. ഡിജിറ്റല്‍ കറന്‍സിയില്‍ ആര്‍.ബി.ഐ ശ്രദ്ധ പതിപ്പിക്കുകയാണെന്നും ആര്‍.ബി.ഐക്ക് മാത്രമല്ല, ലോകത്തിന് തന്നെ നൂതനമാണ് ഡിജിറ്റല്‍ കറന്‍സിയെന്നും അദ്ദേഹം വ്യക്തമാക്കിയിരുന്നു.
പണത്തിന്റെ ഇലക്ട്രോണിക് രൂപമാണ് ഡിജിറ്റല്‍ കറന്‍സി. പണത്തിന്റെ അതേ രീതിയില്‍ ഇടപാടുകള്‍ നടത്താനും സാധിക്കും. മറ്റ് മധ്യവര്‍ത്തികളുടെയോ ബാങ്കുകളുടെയോ സാന്നിധ്യം ഇതിന് ആവശ്യമില്ല. ഡിജിറ്റല്‍ കറന്‍സിയുടെ സുരക്ഷിതത്വം, ഡിജിറ്റല്‍ കറന്‍സി മൂലം വരുന്ന മാറ്റങ്ങള്‍, പണനയം, നിലവിലുള്ള കറന്‍സിയെ ബാധിക്കുന്ന രീതി തുടങ്ങിയവ ആര്‍.ബി.ഐ പഠനവിധേയമാക്കുന്നുണ്ട്.
