![“Manju”](https://santhigirinews.org/wp-content/uploads/2020/04/YOUTUBE.jpg")
മോസ്‌കോ: ബഹിരാകാശ കേന്ദ്രത്തില്‍ ആദ്യമായി സിനിമാ ഷൂടിങ്. ചലച്ചിത്ര നിര്‍മാണത്തിനായി റഷ്യന്‍ സംഘം സോയൂസ് പേടകത്തില്‍ യാത്ര തിരിച്ചു. ‘ചാലെന്‍ജ്‘ എന്നു പേരിട്ടിട്ടുള്ള സിനിമയുടെ ചില ഭാഗങ്ങളാണ് ബഹിരാകാശ കേന്ദ്രത്തില്‍ ചിത്രീകരിക്കുക. നേരത്തേ 2 തവണ പാളിയ ദൗത്യമാണിത്.
നടി യൂലിയ പെരെസില്‍ഡ്, സംവിധായകന്‍ ക്ലിം ഷിപെങ്കോ, ബഹിരാകാശ സഞ്ചാരി ആന്റന്‍ ഷകപ്ലെറോവ് എന്നിവരെ വഹിച്ച്‌ സോയൂസ് എംഎസ്19 പേടകം ബൈകന്നൂരില്‍ നിന്ന് രാജ്യാന്തര ബഹിരാകാശ നിലയത്തിലേക്ക് കുതിച്ചുയര്‍ന്നു. രാജ്യാന്തര ബഹിരാകാശ നിലയത്തിലെ റഷ്യന്‍ ഭാഗത്ത് സിനിമ ചിത്രീകരിക്കാനുള്ള സൗകര്യം കുറവായതുകൊണ്ട് നൗക എന്ന പുതിയ ലാബ് മൊഡ്യൂള്‍ സജ്ജീകരിച്ചിട്ടുണ്ട്. ചിത്രീകരണത്തിനുശേഷം ദൗത്യം പൂര്‍ത്തിയാക്കി ഇവര്‍ 17ന് ഭൂമിയിലേക്ക് തിരിക്കും.
ഹൃദയസംബന്ധമായ രോഗം ബാധിച്ച ബഹിരാകാശ സഞ്ചാരിയുടെ ജീവന്‍ രക്ഷിക്കാനായി പുറപ്പെടുന്ന ഒരു ഡോക്ടറുടെ കഥയാണ് ചിത്രത്തിന്റെ പ്രമേയം. യൂലിയ പെരേസില്‍ഡാണ് ഡോക്ടറുടെ വേഷത്തിലെത്തുന്നത്. ഇപ്പോള്‍ നിലയത്തിലുള്ള റഷ്യയുടെ ഒലേഗ് നൊവിറ്റ്‌സ്‌കിയാണ് രോഗിയായി അഭിനയിക്കുക. മാസങ്ങളായുള്ള പരിശീലനത്തിനൊടുവിലാണ് ഖസാഖിസ്ഥാനിലെ റഷ്യന്‍ സ്പെയ്സ് സെന്ററില്‍ നിന്ന് സംഘം യാത്ര തിരിച്ചത്. ബഹിരാകാശത്ത് സുരക്ഷിതമായി ഇവര്‍ എത്തിച്ചേര്‍ന്നുവെന്നാണ് റിപോര്‍ട്ടുകള്‍.
