![“Manju”](https://santhigirinews.org/wp-content/uploads/2020/04/YOUTUBE.jpg")
തൃശൂര്‍: ഊര്‍ജ തന്മാത്രയുടെ പ്രവര്‍ത്തനത്തെക്കുറിച്ച്‌ പഠിച്ച തൃശൂര്‍ കല്ലൂരിനടുത്ത ആദൂര്‍ സ്വദേശിയായ അനക്സ് ജോസിന്റെ ലേഖനം പ്രശസ്ത ശാസ്ത്ര മാസികയായ ‘സയന്‍സി‘ല്. ശാസ്ത്രലോകത്തിന് മുതല്‍ക്കൂട്ടാകുന്ന കണ്ടെത്തലാണ് അമേരിക്കയിലെ സ്റ്റാന്‍ഫോര്‍ഡ് സര്‍വകലാശാലയില്‍ പ്രഫ. എഡ്വേഡ് സോളമന്റെ കീഴിലെ അവസാന വര്‍ഷ ഗവേഷണ വിദ്യാര്‍ഥിയായ അനക്സ് ജോസ് നടത്തിയത്. ഇതാണ് ആഗോളതലത്തില്‍ ഉന്നത നിലവാരത്തിലുള്ള ഗവേഷണ പ്രബന്ധങ്ങള്‍ പ്രസിദ്ധീകരിക്കുന്ന ശാസ്ത്രമാസികയായ ‘സയന്‍സി‘ല് പ്രസിദ്ധീകരിച്ചത്.
ശ്വസന പ്രക്രിയയിലൂടെ രക്തത്തിലലിയുന്ന ഓക്സിജന്‍ തന്മാത്ര പിന്നീട് ഊര്‍ജ തന്മാത്രയായി (അഡിനോസിന്‍ ട്രൈ ഫോസ്ഫേറ്റ്– എ.ടി.പി) മാറുന്നത് സംബന്ധിച്ച പഠനമാണ് അനക്സ് നടത്തിയത്. ഓക്സിജന്‍ തന്മാത്ര ഊര്‍ജ തന്മാത്രയായി സംഭരിച്ച്‌ ആവശ്യമുള്ള സമയത്ത് ഊര്‍ജം നല്‍കുന്ന പ്രക്രിയയാണ് ശരീരത്തില്‍ നടക്കുന്നത്. നാല് ഇലക്ട്രോണുകളുടെ പ്രതിപ്രവര്‍ത്തനം മൂലമാണ് എ.ടി.പി നിര്‍മിക്കുന്നത്. ഇവയില്‍ മൂന്ന് ഇലക്ട്രോണുകളുടെ പ്രവര്‍ത്തനം മാത്രമേ ഇതുവരെ കണ്ടെത്തിയിരുന്നുള്ളൂ. നാലാമത്തെ ഇലക്‌ട്രോണിന്റെറ പ്രവര്‍ത്തനമാണ് അനക്സ് ജോസ് കണ്ടെത്തിയത്. തൃശൂര്‍ കാല്‍ഡിയന്‍ സിറിയന്‍ എച്ച്‌.എസ്.എസില്‍ പഠിച്ചുകൊണ്ടിരിക്കേ പ്രിന്‍സിപ്പല്‍ ഡോ. അബി പോളിന്റെ ശിക്ഷണത്തില്‍ കഴിവുതെളിയിച്ചിരുന്നു. ഐസര്‍ എന്‍ട്രന്‍സ് ഉയര്‍ന്ന റാങ്കോടെ പാസായി കൊല്‍ക്കത്തയില്‍ അഞ്ചുവര്‍ഷത്തെ ബി.എസ്.എം.എസ് കോഴ്സിന് ചേര്‍ന്നു.
രസതന്ത്രമായിരുന്നു ഐച്ഛിക വിഷയം. സി.എസ്.ഐ.ആര്‍– എന്‍.ഐ.ഐ.എസ്.ടിയില്‍ പ്രഫ. സി.എച്ച്‌. സുരേഷ്, തിരുവനന്തപുരം ഐസറിന്റെ മുന്‍ മേധാവി പ്രഫ. ഇ.ഡി. ജെമ്മിസ് എന്നിവരുടെ സഹായം പഠനത്തില്‍ ലഭിച്ചു.
മൂന്നാം വര്‍ഷം ജര്‍മനിയിലെ ഗോട്ടിങ് സര്‍വകലാശാലയിലെ പ്രഫ. ഗെയ്ഡോ ക്ലവറിന്റെ കീഴില്‍ ജര്‍മന്‍ സ്കോളര്‍ഷിപ്പില്‍ പഠനം തുടര്‍ന്നു. നാലാം വര്‍ഷം യൂനിവേഴ്സിറ്റി ഓഫ് ഷികാഗോയില്‍ പ്രഫ. ലുപിങ് യു ഇന്റെ കീഴില്‍ എസ്. ചന്ദ്രശേഖര്‍ സ്കോളര്‍ഷിപ്പോടെ പ്രവേശനം ലഭിച്ചു. ആദൂര്‍ തെക്കേത്തല ജോസ്-- ജെസി ദമ്പതികളുടെ മകനാണ്. സഹോദരി അനീന .
