പെണ്കുട്ടികളുടെ വിദ്യാഭ്യാസം ഉറപ്പാക്കണം; മലാല
കാബൂള്: പെണ്കുട്ടികളുടെ വിദ്യാഭ്യാസം ഉറപ്പാക്കണമെന്ന് ആവശ്യപ്പെട്ട് താലിബാന് നേതാക്കള്ക്ക് കത്തയച്ച് നൊബേല് ജേതാവ് മലാല യൂസഫ്സായ്. പെണ്കുട്ടികളുടെ വിദ്യാഭ്യാസത്തിനുള്ള നിരോധനം പിന്വലിച്ച് സ്കൂളുകള് ഉടനടി തുറക്കുക. പെണ്കുട്ടികള്ക്ക് വിദ്യാഭ്യാസം നിഷേധിക്കുന്ന ലോകത്തിലെ ഏക രാജ്യം അഫ്ഗാനിസ്ഥാനാണെന്നും മലാല കത്തില് പറയുന്നു.
അതേസമയം അഫ്ഗാനിസ്താനില് പെണ്കുട്ടികളുടെ സ്കൂള് വിദ്യാഭ്യാസം ഉടന് പുനരാരംഭിക്കുമെന്ന പ്രഖ്യാപനവുമായി താലിബാന്. നാളുകളായി അഫ്ഗാനില് പെണ്കുട്ടികളെയും വനിത അദ്ധ്യാപകരെയും വിദ്യാഭ്യാസ സ്ഥാപനങ്ങളിലേക്ക് കടക്കുന്നത് നിരോധിച്ചിരിക്കുന്ന സാഹചര്യത്തിലാണ് പുതിയ പ്രഖ്യാപനം. രാജ്യത്ത് സെക്കന്ഡറി സ്കൂളുകളിലേക്ക് പെണ്കുട്ടികളെ ഉടന് അനുവദിക്കുമെന്നും കൃത്യമായ തിയതിയും മറ്റ് വിവരങ്ങളും ഉടന് അറിയിക്കുമെന്നുമാണ് താലിബാന്റെ ആഭ്യന്തര മന്ത്രാലയ വക്താവ് സയീദ് ഖോസ്റ്റി പ്രഖ്യാപിച്ചിരിക്കുന്നത്.