ഓള്ഡി ഒഫ് ദ ഇയര് പുരസ്കാരം നിരസിച്ച് എലിസബത്ത് രാജ്ഞി
ലണ്ടന്: ബ്രിട്ടനില് ഏറ്റവുമധിക കാലം അധികാരത്തിലിരുന്ന ഭരണാധികാരിയാണെങ്കിലും ഓള്ഡി ഒഫ് ദ ഇയര് പുരസ്കാരം നല്കി തന്നെ വൃദ്ധയാക്കുന്നതിനോട് എലിസബത്ത് രാജ്ഞിയ്ക്ക് താല്പര്യമില്ല. പ്രശസ്ത ബ്രിട്ടീഷ് മാഗസിനായ ദ ഓള്ഡി സംഘടിപ്പിച്ച പുരസ്കാരമാണ് രാജ്ഞി ബഹുമാനപൂര്വം നിരസിച്ചത്. വാര്ദ്ധക്യകാലത്ത് പൊതുസമൂഹത്തിന് പ്രത്യേക സംഭാവന നല്കുന്ന വ്യക്തിയ്ക്ക് ഓരോ വര്ഷവും ഈ പുരസ്കാരം നല്കാറുണ്ട്. 2011ല് 90ാം വയസ്സില് രാജ്ഞിയുടെ ഭര്ത്താവായ ഫിലിപ്പ് രാജകുമാരന് ഓള്ഡി ഒഫ് ദ ഇയര് ലഭിച്ചിരുന്നു. മനസ്സില് തോന്നുന്നതാണ് യഥാര്ത്ഥ പ്രായമെന്നും പുരസ്കാരം നേടാനുള്ള മാനദണ്ഡത്തില് താന് എത്തിച്ചേര്ന്നിട്ടില്ലെന്നും 95 കാരിയായ രാജ്ഞി പറഞ്ഞു.
അര്ഹതയുള്ളവര്ക്ക് പുരസ്കാരം എത്തിച്ചേരട്ടെ എന്നും അവര് ആശംസിച്ചു. രാജ്ഞിയുടെ അസിസ്റ്റന്റ് പ്രൈവറ്റ് സെക്രട്ടറിയായ ലെയിംഗ് ബേക്കറാണ് ഇതുസംബന്ധിച്ച് മാഗസിന് അധികൃതര്ക്ക് കത്തയച്ചത്. രാജ്ഞി നിഷേധിച്ചതോടെ പുരസ്കാരം ഫ്രഞ്ച് -അമേരിക്കന് അഭിനേത്രിയും നര്ത്തകിയുമായ ലെസ്ലി കാരണിന് സമര്പ്പിക്കുന്നതായി അധികൃതര് അറിയിച്ചു. 90 വയസ്സുണ്ട് ലെസ്ലിയ്ക്ക്.