ന്യൂഡല്ഹി: കോവിഡിന്റെ പുതിയ ഡെല്റ്റ വകഭേദമായ എ.വൈ 4.2 ഇന്ത്യയില് സ്ഥിരീകരിച്ചതായി റിപ്പോര്ട്ട്. കിഴക്കന് യൂറോപ്പിലും ബ്രിട്ടനിലും ഇതിനുമുമ്പ് റിപ്പോര്ട്ട് ചെയ്ത എ.വൈ 4.2 മധ്യപ്രദേശിലും മഹാരാഷ്ട്രയിലുമാണ് റിപ്പോര്ട്ട് ചെയ്തിരിക്കുന്നത്. എന്നാല്, ആശങ്കപ്പെടേണ്ട സാഹചര്യമില്ലെന്നും നിലവില് 30ല് താഴെ കേസുകള് മാത്രമാണ് റിപ്പോര്ട്ട് ചെയ്തിരിക്കുന്നതെന്നും ആരോഗ്യവകുപ്പ് അറിയിച്ചു.
ജീനോം റിപ്പോര്ട്ട് പ്രകാരം ഇന്ഡോറില് ഏഴു കേസുകളാണ് പുതിയ വകഭേദത്തിന്റെതായി റിപ്പോര്ട്ട് ചെയ്തിരിക്കുന്നത്. രോഗബാധിതരായ ഏഴുപേരില് രണ്ടുപേര് ആര്മി ഉദ്യോഗസ്ഥന്മാരാണെന്നും ഇന്ഡോര് ചീഫ് മെഡിക്കല് ആന്ഡ് ഹെല്ത്ത് ഓഫിസര് ഡോ. ബി.എസ്. സത്യ പറഞ്ഞു.
ഡെല്റ്റ വകഭേദത്തേക്കാള് പകര്ച്ചവ്യാപന ശേഷി എ.വൈ 4.2 വകഭേദത്തിന് കൂടുതലാണെന്നാണ് ശാസ്ത്രജ്ഞരുടെ വിലയിരുത്തല്. അതേസമയം, ഡെല്റ്റ– ആല്ഫ വകഭേദങ്ങളെപ്പോലെ വലിയ ഭീഷണി പുതിയ വൈറസ് ഉയര്ത്തില്ലെന്നും വിദഗ്ധര് പറയുന്നു. യു.കെയില് ശരാശരിയില് ഏകദേശം ആറുശതമാനം കേസുകളും ഈ പുതിയ വകഭേദത്താലാണെന്നാണ് റിപ്പോര്ട്ടുകള്. അമേരിക്ക, ജര്മനി, ഡെന്മാര്ക്ക്, റഷ്യ, ഇസ്രയേല് എന്നിവിടങ്ങളിലും പുതിയ വകഭേദം കണ്ടെത്തിയിരുന്നു.