ഭോപാല്: ഹബീബ്ഗഞ്ചില് ലോകോത്തര നിലവാരത്തിലുള്ള ഇന്ത്യയിലെ ആദ്യത്തെ റെയില്വേ സ്റ്റേഷന് റാണി കമലാപതി പ്രധാനമന്ത്രി നരേന്ദ്ര മോദി രാഷ്ട്രത്തിനു സമര്പ്പിച്ചു. അന്തര്ദേശീയ വിമാനത്താവളങ്ങളുടെ നിലവാരത്തിലാണ് റെയില്വേ സ്റ്റേഷന് നിര്മിച്ചിരിക്കുന്നത്. ഇത് രാജ്യത്തിന്റെ അഭിമാനമാണെന്നും അദ്ദേഹം കൂട്ടിച്ചേര്ത്തു.
രാജ്യം വി.ഐ.പി സംസ്കാരത്തില്നിന്ന് ‘ഇ.പി.ഐ’ (എവരിപേഴ്സന് ഈസ് ഇംപോര്ട്ടന്റ്) മാതൃകയിലേക്ക് മാറുകയാണെന്ന് പ്രധാനമന്ത്രി പറഞ്ഞു. ഹബീബ്ഗഞ്ച് എന്നറിയപ്പെട്ടിരുന്ന റെയില്വേ സ്റ്റേഷന്റെ പേര് നവീകരണത്തിനുശേഷം മാറ്റുകയായിരുന്നു. റാണി കമലാപതിയോടുള്ള ആദരസൂചകമായാണ് പുനര്നാമകരണം ചെയ്തത്. ഗോണ്ട രാജവംശത്തിലെ റാണിയാണ് കമലാപതി.
ലിഫ്റ്റുകള്, എലിവേറ്ററുകള്, ട്രാവലേറ്ററുകള്, റാമ്പുകള് എന്നിവ കൂടാതെ വൈഫൈ സൗകര്യം, സി.സി.ടി.വികള്, ആധുനിക പാസഞ്ചര് ഇന്ഫര്മേഷന് ആന്ഡ് എന്റര്ടെയ്ന്മെന്റ്സിസ്റ്റം, ഗെയിമിങ് സോണ്, ഹോസ്പിറ്റല്, മാള്, സ്മാര്ട്ട് പാര്ക്കിങ്, ഫുഡ് സോണ് എന്നിവയും ഇതില് സജ്ജീകരിച്ചിച്ചിട്ടുണ്ട്.