കാബൂള്: അഫ്ഗാനിസ്താന് അഞ്ച് ലക്ഷം ഡോസ് കോവിഡ് വാക്സിന് നല്കി ഇന്ത്യ. ഭാരത് ബയോടെക് നിര്മ്മിച്ച കോവാക്സിനാണ് ഇന്ത്യ അഫ്ഗാന് കൈമാറിയത്. വിദേശകാര്യമന്ത്രാലയമാണ് അഫ്ഗാന് വാക്സിന് നല്കിയ വിവരം അറിയിച്ചത്. രാജ്യത്തിനുള്ള മനുഷത്വപരമായ സഹായങ്ങള് ഇനിയും തുടരുമെന്നും ഇന്ത്യ വ്യക്തമാക്കി.
കാബൂളിലെ ഇന്ദിരാഗാന്ധി ആശുപത്രിക്കാണ് സഹായം കൈമാറിയത്. വരും ആഴ്ചകളില് അഞ്ച് ലക്ഷം ഡോസ് വാക്സിന് കൂടി ഇന്ത്യ നല്കും. ഭക്ഷ്യധാന്യങ്ങള്, 10 ലക്ഷം ഡോസ് കോവിഡ് വാക്സിന്, മരുന്നുകള് എന്നിവ അഫ്ഗാന് നല്കുമെന്നായിരുന്നു ഇന്ത്യ അറിയിച്ചിരുന്നത്. നേരത്തെ 1.6 ടണ് മരുന്ന് ലോകാരോഗ്യ സംഘടന വഴി ഇന്ത്യ അഫ്ഗാന് കൈമാറിയിരുന്നു.
വരുന്ന ആഴ്ചകളില് ഗോതമ്പും ശേഷിക്കുന്ന മരുന്നുകളും അഫ്ഗാന് കൈമാറും. ഇതിനായി യു.എന് ഏജന്സികളുമായി നിരന്തര ചര്ച്ച നടത്തുന്നുണ്ട്. അവരുമായുള്ള ചര്ച്ചക്ക് ശേഷമാവും സഹായം ഏത് രീതിയില് കൈമാറണമെന്നത് സംബന്ധിച്ച് അന്തിമ തീരുമാനമെടുക്കുകയെന്നും വിദേശകാര്യമന്ത്രാലയം അറിയിച്ചു. ആഗസ്റ്റ് 15ന് അഫ്ഗാനിസ്താനില് താലിബാന് അധികാരം പിടിച്ചതിന് ശേഷം രാജ്യത്തിനുള്ള വിദേശസഹായങ്ങളില് വലിയ രീതിയിലുള്ള കുറവ് വന്നിരുന്നു.