കൊച്ചി: ജില്ലയില് കെ-റെയില് സില്വര് ലൈന് പാതക്ക് രണ്ട് സ്റ്റേഷനുകള്. കാക്കനാട് ഇന്ഫോപാര്ക്കിന് സമീപവും നെടുമ്പാശ്ശേരി വിമാനത്താവളത്തിന് സമീപവുമാണ് സ്റ്റേഷനുള്ളത്. ഇതില് കാക്കനാട് ഇന്ഫോ പാര്ക്കില് കൊച്ചി മെട്രോയും സില്വര് ലൈനും ഒരേ സ്റ്റേഷന് കെട്ടിടത്തിലാകും സ്ഥിതി ചെയ്യുക.
കൂടാതെ, ജില്ലയിലെ രണ്ട് സ്റ്റേഷനില്നിന്നും പ്രധാനപ്പെട്ട സ്ഥലങ്ങളിലേക്ക് ലാസ്റ്റ് മൈല് കണക്ടിവിറ്റിയുമുണ്ടാകും. ദേശീയ ജലപാതയില്നിന്ന് കണക്ടിവിറ്റി ഉണ്ടാകുമെന്ന് കെ-റെയില് എം.ഡി വി.അജിത് കുമാര് പറഞ്ഞു. സ്റ്റേഷന് സമുച്ചയത്തില് ഷോപ്പിങ് മാള്, ഹോട്ടലുകള്, ബിസിനസ് ഹബ് എന്നിവയുമുണ്ടാകും. വൈദ്യുതി വാഹനങ്ങള്ക്ക് ചാര്ജ് ചെയ്യാനുള്ള സൗകര്യമുണ്ടാകും. ജില്ലയിലൂടെ 52 കിലോമീറ്റര് പാതയാണ് കടന്നുപോകുന്നത്.