പാലക്കാട്: ബാബുവിന് ലഭിച്ച സംരക്ഷണം ആര്ക്കുമുണ്ടാകില്ലെന്നും കുമ്പാച്ചി മലയില് ഇനി കയറുന്നവര്ക്കെതിരെ നിയമനടപടി സ്വീകരിക്കുമെന്നും വനംമന്ത്രി എ.കെ. ശശീന്ദ്രന്. കുമ്പാച്ചി മലയുടെ മുകളില് ഒരാള് കൂടി കുടുങ്ങിയ സാഹചര്യത്തിലാണ് മന്ത്രി ഇക്കാര്യം വ്യക്തമാക്കിയത്. മല കയറാന് കൃത്യമായ നിബന്ധനകള് ഉണ്ടാക്കുമെന്നും മന്ത്രി പറഞ്ഞു. ബാബുവിന് കിട്ടിയ സംരക്ഷണം മറയാക്കി ആരും മല കയറരുതെന്നും മന്ത്രി ആവശ്യപ്പെട്ടു.
ഇന്നലെ വനംവകുപ്പ് നടത്തിയ തെരച്ചിലില് നാട്ടുകാരനായ രാധാകൃഷ്ണനെയാണ് കണ്ടെത്താനായത്. ആറ് മണിക്കൂര് നീണ്ടുനിന്ന തെരച്ചിലിനൊടുവിലാണ് ഇയാളെ കണ്ടെത്തി ബേസ് ക്യാമ്പിലെത്തിച്ചത്. രാധാകൃഷ്ണന് സ്ഥിരമായി കാട്ടിലൂടെ നടക്കുന്ന ആളാണെന്നും ഇയാള്ക്ക് മാനസിക പ്രശ്നമുണ്ടെന്നും അധികൃതര് അറിയിച്ചു. രാധാകൃഷ്ണനെതിരെ കേസെടുക്കില്ലെന്നും വനംവകുപ്പ് വ്യക്തമാക്കിയിരുന്നു.