നിതി ആയോഗിന് മലയാളി മേധാവി

ന്യൂഡല്‍ഹി: മുൻ സിവിൽ സർവീസ് ഉദ്യോഗസ്ഥനും സ്വച്ഛ് ഭാരത് മിഷന് നേതൃത്വം നൽകിയ മലയാളിയുമായ പരമേശ്വരൻ അയ്യരെ നീതി ആയോഗിന്റെ പുതിയ ചീഫ് എക്സിക്യൂട്ടീവ് ഓഫീസറായി നിയമിച്ചു. നിലവിലെ സിഇഒ അമിതാഭ് കാന്ത് ഈ മാസം 30ന് വിരമിക്കും. കോഴിക്കോട് കുടുംബവേരുകളുള്ള പരമേശ്വരൻ അയ്യർ 1981 ബാച്ച് ഉത്തർപ്രദേശ് കേഡർ ഐ.എ.എസ് ഉദ്യോഗസ്ഥനാണ്.
2009 ൽ സർവീസിൽ നിന്ന് വിരമിച്ച പരമേശ്വരൻ അയ്യരെ 2016 ൽ ഇന്ത്യാ ഗവൺമെന്റ് കുടിവെള്ള ശുചിത്വ മന്ത്രാലയത്തിന്റെ സെക്രട്ടറിയായി നിയമിച്ചു. അദ്ദേഹത്തിന്റെ മേൽനോട്ടത്തിൽ മന്ത്രാലയം ദേശീയ സ്വച്ഛ് ഭാരത് മിഷൻ നടപ്പാക്കി.
ജലസ്രോതസ്സുകൾ, ശുചിത്വം തുടങ്ങിയ മേഖലകളിൽ നൂതനാശയങ്ങൾ ആവിഷ്കരിക്കുന്നതിൽ വൈദഗ്ധ്യം തെളിയിച്ച അയ്യർ 1998 മുതൽ 2006 വരെ ഐക്യരാഷ്ട്രസഭയിലെ മുതിർന്ന ഗ്രാമീണ ജല ശുചിത്വ വിദഗ്ധനായും സേവനമനുഷ്ഠിച്ചിട്ടുണ്ട്. 2020 ൽ കുടിവെള്ള, ശുചിത്വ മന്ത്രാലയത്തിന്റെ സെക്രട്ടറിയായി വിരമിച്ച അദ്ദേഹം ലോകബാങ്കിൽ ജോലി ചെയ്യുന്നതിനായി അമേരിക്കയിലേക്ക് പോയി. ഇപ്പോൾ അവിടെ പ്രവർത്തിക്കുന്നു. കുടുംബ വേരുകൾ കോഴിക്കോടാണെങ്കിലും  പരമേശ്വരൻ ജനിച്ചത് ശ്രീനഗറിലാണ്. . ഡൂൺ സ്കൂൾ, ഡൽഹിയിലെ സെന്റ് സ്റ്റീഫൻസ് കോളേജ് എന്നിവിടങ്ങളിലായിട്ടായിരുന്നു വിദ്യാഭ്യാസം നടത്തിയത്.