താലൂക്കാശുപത്രിയില് മരം കടപുഴകി; രണ്ട് കാറുകള് തകര്ന്നു
തിരുവനന്തപുരം ;ചിറയിന്കീഴ് താലൂക്കാശുപത്രിയില് ആഞ്ഞിലി മരം കടപുഴുകി വീണ് രണ്ട് കാറുകള് തകര്ന്നു. കാറിനുള്ളിലിരുന്നവര് രക്ഷപ്പെട്ടത് തലനാരിഴക്ക്. രാവിലെയോടെയായിരുന്നു സംഭവം. ആശുപത്രിയിലെ മോര്ച്ചറിക്ക് സമീപം നിന്ന പഴക്കമുള്ള ആഞ്ഞിലി മരം കടപുഴുകി വീഴുകയായിരുന്നു.
മോര്ച്ചറിക്ക് സമീപം പാര്ക്ക് ചെയ്തിരുന്ന ആശുപത്രിയിലെ പീഡിയാട്രിഷ്യന് ഡോ. ഗ്ലാഡിസിന്റെ ഹോണ്ട കാറും അഞ്ചുതെങ്ങ് സ്വദേശിയായ ജസ്റ്റിന്റെ മാരുതി വാഗണ് ആര് കാറുമാണ് തകര്ന്നത്. മരത്തിന്റെ ശിഖരങ്ങള് മറ്റ് മരങ്ങളില് തട്ടിയ ശബ്ദം കേട്ട് കാറില് ഉണ്ടായിരുന്ന സുരേന്ദ്രന് കാറ് തുറന്ന് പുറത്തേക്കോടി. നിരവധി മരങ്ങളില് തട്ടി പതുക്കെയാണ് ആഞ്ഞിലി നിലത്ത് പതിച്ചത്. ചെറു ചില്ലകള് തട്ടി നിലത്തുവീണ അഞ്ചുതെങ്ങ് സുരേന്ദ്രന് ചികിത്സ നല്കി.തുടര്ന്ന് സംഭവമറിഞ്ഞ് ആറ്റിങ്ങല് ഫയര്ഫോഴ്സ് എത്തി മരം മുറിച്ചുനീക്കി കാറുകള് പുറത്തെടുത്തു. രണ്ടു കാറുകളും പൂര്ണമായും തകര്ന്നു. മോര്ച്ചറിക്ക് സമീപത്ത് ആള്ത്തിരക്കില്ലാത്തതിനാല് വന് ദുരന്തം ഒഴിഞ്ഞു