കരട് റിപ്പോര്ട്ട് മന്ത്രിസഭ അംഗീകരിച്ചു
മനാമ: കെട്ടിട പുനര്നിര്മാണ നിബന്ധനകള് പുനര്നിര്ണയിച്ച കരട് മന്ത്രിസഭയോഗം അംഗീകരിച്ചു. ഉപപ്രധാനമന്ത്രിയും അടിസ്ഥാന സൗകര്യ വികസനകാര്യ മന്ത്രിയുമായ ശൈഖ് ഖാലിദ് ബിന് അബ്ദുല്ല ആല് ഖലീഫയുടെ അധ്യക്ഷതയില് ഗുദൈബിയ പാലസില് ചേര്ന്ന കാബിനറ്റ് യോഗത്തിലാണ് ഇതുസംബന്ധിച്ച കരട് റിപ്പോര്ട്ട് അവതരിപ്പിച്ച് ചര്ച്ച ചെയ്തത്. ബഹ്റൈന് സന്ദര്ശനത്തിനെത്തിയ മാലദ്വീപ് പ്രസിഡന്റ് ഇബ്രാഹിം മുഹമ്മദ് സാലിഹുമായി രാജാവ് ഹമദ് ബിന് ഈസ ആല് ഖലീഫ നടത്തിയ കൂടിക്കാഴ്ചയും ചര്ച്ചയും ഇരുരാജ്യങ്ങള്ക്കുമിടയില് സഹകരണം ശക്തിപ്പെടുത്തുന്നതിനുള്ള ധാരണപത്രങ്ങളില് ഒപ്പുവെച്ചതും നേട്ടമാണെന്ന് വിലയിരുത്തി. കിരീടാവകാശിയും പ്രധാനമന്ത്രിയുമായ പ്രിന്സ് സല്മാന് ബിന് ഹമദ് ആല് ഖലീഫ ബഹ്റൈന് ചേംബര് ഓഫ് കോമേഴ്സ് സന്ദര്ശിച്ച നടപടിയെ സ്വാഗതം ചെയ്തു. രാജ്യത്തെ സാമ്പത്തികവളര്ച്ചയില് ചേംബര് ഓഫ് കോമേഴ്സ് നിര്വഹിച്ചുകൊണ്ടിരിക്കുന്ന പങ്ക് വളരെ വലുതാണെന്ന് കാബിനറ്റ് വിലയിരുത്തി. ഫ്ലക്സി വിസ നിര്ത്തലാക്കാനും വിവിധയിടങ്ങളില് തൊഴില്പരിശോധന കര്ശനമാക്കാനുമുള്ള തീരുമാനം ഏറെ ഗുണകരമാകുമെന്നും വിലയിരുത്തി.