![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി : ഇന്ത്യ തദ്ദേശീയമായി നിര്‍മ്മിക്കുന്ന ഇരട്ട എഞ്ചിന്‍ ഡെക്ക് അധിഷ്ഠിത ഫൈറ്ററിന്റെ (ടിഇഡിബിഎഫ്) ആദ്യ ഡിസൈന്‍ അടുത്ത വര്‍ഷം മാര്‍ച്ചോടെ പൂര്‍ത്തിയാകുമെന്നും 2028 ഓടെ ആദ്യ മോഡല്‍ പുറത്തിറക്കാന്‍ കഴിയുമെന്നും സീനിയര്‍ ഡിഫന്‍സ് റിസര്‍ച്ച്‌ ആന്‍ഡ് ഡെവലപ്മെന്‍റ് ഓര്‍ഗനൈസേഷന്‍ (ഡിആര്‍ഡിഒ) അധികൃതര്‍ പറഞ്ഞു.
യുദ്ധവിമാനത്തിന്റെ മോഡല്‍ പതിപ്പ് ഏതാണ്ട് പൂര്‍ത്തിയായെന്നും സൂപ്പര്‍സോണിക് വിമാനത്തിന്റെ പ്രകടനം വിലയിരുത്താനുള്ള ശ്രമങ്ങള്‍ തുടരുകയാണെന്നും ഡിആര്‍ഡിഒ പ്രോജക്‌ട് ഡയറക്ടര്‍ പി തങ്കവേല്‍ പറഞ്ഞു. യുദ്ധവിമാനത്തിനായി അനുവദിച്ച ഫണ്ട് ഉപയോഗിച്ച്‌ വളരെ വേഗത്തിലാണ് നിര്‍മ്മാണ പ്രവര്‍ത്തനങ്ങള്‍ നടക്കുന്നത്. ഇതിന്റെ പ്രാഥമിക രൂപം മാര്‍ച്ചോടെ അവലോകനം ചെയ്യാനാകുമെന്നും അദ്ദേഹം കൂട്ടിച്ചേര്‍ത്തു.
“പിഡിആറിന് ശേഷം, ഫൈറ്ററിന്റെ ഡ്രോയിംഗുകള്‍ നിര്‍മ്മിക്കും. 2023 പകുതിയോടെ സിസിഎസ് ക്ലിയറന്‍സ് ലഭിക്കുമെന്നാണ് പ്രതീക്ഷിക്കുന്നത്. നിലവിലെ സാഹചര്യത്തില്‍, ഒറിജിനല്‍ 4-4.5 വര്‍ഷത്തിനുള്ളില്‍ നിര്‍മ്മിക്കാന്‍ കഴിയും. നാവികസേനയ്ക്കായി ഉപയോഗിക്കുന്ന വിമാനത്തിന്റെ രൂപകല്‍പ്പന വ്യത്യസ്തമാണ് എന്നതാണ് കാലതാമസത്തിന് കാരണം”, അദ്ദേഹം പറഞ്ഞു.
മൂലരൂപം നിര്‍മ്മിച്ചുകഴിഞ്ഞാല്‍, ഇന്ത്യന്‍ നാവികസേന എച്ച്‌എഎല്ലിനായി ഒരു പ്രൊഡക്ഷന്‍ ഓര്‍ഡര്‍ നല്‍കും. കാലഹരണപ്പെട്ട മിഗ്-29 കെയ്ക്ക് പകരമായി ഇവ ഉപയോഗിക്കും. 2031 അല്ലെങ്കില്‍ 2032 ഓടെ ടിഇഡിബിഎഫ് വിമാനം ഇന്ത്യന്‍ നാവികസേനയില്‍ ഉള്‍പ്പെടുത്താന്‍ കഴിയുമെന്നും അദ്ദേഹം കൂട്ടിച്ചേര്‍ത്തു.
