![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂ ഡല്‍ഹി: രാഷ്ട്രപതി ദ്രൗപദി മുര്‍മു, ഉത്തര്‍പ്രദേശിലെ ഗ്രേറ്റര്‍ നോയിഡയില്‍ ഏഴാമത് ഇന്ത്യ ജല വാരം ഉദ്ഘാടനം ചെയ്തു. ജലത്തിന്റെ പ്രശ്നം ഇന്ത്യക്ക് മാത്രമല്ല, ലോകത്തിനാകെ പ്രസക്തമാണെന്ന് ചടങ്ങില്‍ സംസാരിച്ച രാഷ്ട്രപതി പറഞ്ഞു. ശുദ്ധ ജല സ്രോതസ്സുകള്‍, രണ്ടോ അതിലധികമോ രാജ്യങ്ങള്‍ക്കിടയില്‍ വ്യാപിച്ചിരിക്കുന്നതിനാല്‍ ഈ പ്രശ്നം ദേശീയ സുരക്ഷയുമായി ബന്ധപ്പെട്ടിരിക്കുന്നു.
അതിനാല്‍, ഈ സംയുക്ത ജലസ്രോതസ്സ് അന്താരാഷ്ട്ര സഹകരണം ആവശ്യമായ ഒരു പ്രശ്നമാണ്. ഡെന്‍മാര്‍ക്ക്, ഫിന്‍ലാന്‍ഡ്, ജര്‍മ്മനി, ഇസ്രായേല്‍, യൂറോപ്യന്‍ യൂണിയന്‍ എന്നിവ ഏഴാമത് ഇന്ത്യ ജല വാരത്തില്‍ പങ്കെടുക്കുന്നതായി ശ്രീമതി മുര്‍മു സന്തോഷത്തോടെ അറിയിച്ചു. ഈ ഫോറത്തിലെ ആശയങ്ങളുടെയും സാങ്കേതികവിദ്യകളുടെയും കൈമാറ്റം എല്ലാവര്‍ക്കും പ്രയോജനപ്പെടുമെന്ന് അവര്‍ ആത്മവിശ്വാസം പ്രകടിപ്പിച്ചു.
ഒരു പഠനമനുസരിച്ച്‌ നമ്മുടെ രാജ്യത്തെ ജലസ്രോതസ്സുകളുടെ 80 ശതമാനവും കാര്‍ഷിക ആവശ്യങ്ങള്‍ക്കാണ് ഉപയോഗിക്കുന്നതെന്ന് രാഷ്ട്രപതി പറഞ്ഞു. അതിനാല്‍, ജലസംരക്ഷണത്തിനായി, ജലസേചനത്തിനുപയോഗിക്കുന്ന ജലത്തിന്റെ ശരിയായ ഉപയോഗവും പരിപാലനവും വളരെ പ്രധാനമാണ്. വര്‍ദ്ധിച്ചുവരുന്ന ജനസംഖ്യയ്ക്ക് ശുദ്ധമായ കുടിവെള്ളം ലഭ്യമാക്കുന്നത് വരും വര്‍ഷങ്ങളില്‍ വലിയ വെല്ലുവിളിയായിരിക്കുമെന്ന് രാഷ്ട്രപതി പറഞ്ഞു. ജലവുമായി ബന്ധപ്പെട്ട വിഷയം ബഹുമുഖവും സങ്കീര്‍ണ്ണവുമാണ്. അത് നേരിടുന്നതിന് എല്ലാ പങ്കാളികളും പരിശ്രമിക്കണം. സാധാരണക്കാരോടും കര്‍ഷകരോടും വ്യവസായികളോടും പ്രത്യേകിച്ച്‌ കുട്ടികളോടും ജലസംരക്ഷണം അവരുടെ ധാര്‍മ്മികതയുടെ ഭാഗമാക്കാന്‍ രാഷ്ട്രപതി അഭ്യര്‍ത്ഥിച്ചു. അങ്ങനെ ചെയ്താല്‍ മാത്രമേ വരും തലമുറകള്‍ക്ക് മികച്ചതും സുരക്ഷിതവുമായ ഒരു ഭാവി സമ്മാനിക്കാന്‍ കഴിയൂ എന്നും അവര്‍ പറഞ്ഞു.
