“ഇഴയടുപ്പിച്ച് കയർ”: കയർ വ്യവസായത്തെ ആധുനികവത്ക്കരിക്കാൻ ജില്ല

ബിന്ദുലാൽ തൃശ്ശൂർ

പരമ്പരാഗത കയർ വ്യവസായത്തെ അടിമുടി മോഡേണാക്കാൻ തയ്യാറെടുക്കുകയാണ് ജില്ലാ കയർ വ്യവസായ വകുപ്പ്. അടിസ്ഥാന വികസന പ്രവർത്തനങ്ങൾക്കായി നാലു കോടി രൂപ ധനസഹായം ലഭിച്ച
ജില്ലയിലെ പതിമൂന്ന് കയർ സഹകരണ സംഘങ്ങളിൽ ഇതിന്റെ ഭാഗമായുള്ള പ്രവർത്തനങ്ങൾ പുരോഗമിക്കുകയാണ്. 2020-21 സാമ്പത്തിക വർഷത്തിൽ എട്ട് കയർ സംഘങ്ങളിൽ 90 ഓട്ടോമാറ്റിക് സ്പിന്നിംഗ് മെഷീനുകൾ സ്ഥാപിച്ചു. ഇവിടങ്ങളിൽ ഫാക്ടറി മോഡൽ ഉത്പാദനം ആരംഭിക്കുന്നതിന് തുടക്കമിട്ടു കഴിഞ്ഞു. ഒക്ടോബർ 20 വരെ വിവിധ ദിവസങ്ങളിൽ ധനമന്ത്രി ഡോ തോമസ് ഐസക് ഇവയുടെ ഉദ്ഘാടനം നിർവ്വഹിക്കും. കരൂപ്പടന്ന-വള്ളിവട്ടം സി വി എസ് ഒക്ടോബർ ആറ് മുതൽ പ്രവർത്തനം ആരംഭിച്ചു കഴിഞ്ഞു. വെളുത്തകടവ് സി വി സി എസ് ഒക്ടോബർ ഏഴ്, പുത്തൻചിറ സി വി സി എസ് ഒക്ടോബർ എട്ട്, കടലായി കാരുമാത്ര സി വി സി എസ് ഒക്ടോബർ 9, ചാപ്പാറ സി വി സി എസ് ഒക്ടോബർ 10, കരിക്കൊടി സി വി സി എസ് ഒക്ടോബർ 12, അഴീക്കോട് സി വി സി എസ് ഒക്ടോബർ 13, എൽത്തുരുത്ത് സി വി സി എസ് ഒക്ടോബർ 14, മാള ഡി എഫ് ഐ സി എസ് ഒക്ടോബർ 15 എന്നീ ദിവസങ്ങളിലായി ഉദ്‌ഘാടനം ചെയ്യും.

ഈ സാമ്പത്തികവർഷം തന്നെ അടിസ്ഥാന വികസന പ്രവർത്തനങ്ങൾ പൂർത്തിയാക്കിയ മറ്റു സംഘങ്ങൾ കൂടി ഫാക്ടറി മോഡൽ ഉൽപാദനത്തിന് മാറ്റാൻ വേണ്ട നടപടികളും പുരോഗമിക്കുകയാണ്. ഇതിനായി കൊടുങ്ങല്ലൂർ നിയോജക മണ്ഡലത്തിലെ 7 സംഘങ്ങൾക്ക് വിവിധ ഉപകരണങ്ങൾ വാങ്ങുവാൻ 581.35 ലക്ഷം രൂപയും കയ്പമംഗലം മണ്ഡലത്തിലെ മൂന്ന് സംഘങ്ങൾക്കായി 246.438 ലക്ഷം രൂപയും നാട്ടിക മണ്ഡലത്തിലെ രണ്ട് സംഘങ്ങൾക്കായി 129 ലക്ഷം രൂപയും മണലൂർ മണ്ഡലത്തിലെ നാലു സംഘങ്ങൾക്കായി 44.5 ലക്ഷം രൂപയുമാണ് അനുവദിച്ചിരിക്കുന്നത്.

2017ലെ ‘കയർ കേരള’യ്ക്ക് ശേഷം 2017 ഡിസംബർ പത്തിന് ജില്ലയിൽ ആദ്യത്തെ ചകിരി മിൽ ചാപ്പാറ കയർ സംഘത്തിൽ സ്ഥാപിച്ചു കൊണ്ടാണ് ആധുനിക കയർ വ്യവസായത്തിന് ജില്ലയിൽ തുടക്കം കുറിക്കുന്നത്. തുടർന്ന് 2018 -19 കാലയളവിൽ തൃശൂർ കയർ പ്രോജക്ട് പരിധിയിലുള്ള ഒമ്പത് കയറുപിരി സംഘങ്ങളിൽ ചകിരി മില്ലുകൾ സ്ഥാപിച്ച് ആവശ്യമായ ചകിരിനാരിൽ സ്വയംപര്യാപ്തത കൈവരിക്കുന്നതിനുള്ള ആദ്യ നടപടി സ്വീകരിച്ചു. തുടർന്ന് ഘട്ടംഘട്ടമായി ഓരോ സംഘത്തിനും മെച്ചപ്പെട്ട ഉൽപാദനം കൈവരിക്കുന്നതിന് ആവശ്യമായ വില്ലോവിംഗ് മെഷീൻ, ബെയിലിംഗ് പ്രസ്സ്, വെയിംഗ് ബാലൻസ്, ഇലക്ട്രോണിക് റാട്ട്, ഓട്ടോമാറ്റിക് സ്പിന്നിംഗ് മെഷീൻ മുതലായ ആധുനിക മെഷിനറികളും വിതരണം ചെയ്തു. 2018 -19 സാമ്പത്തിക വർഷത്തിൽ സ്വകാര്യ മേഖലയിൽ മൂന്നും കുടുംബശ്രീ മുഖേന രണ്ടും ചകിരി മില്ലുകൾ സ്ഥാപിച്ച് പ്രവർത്തനമാരംഭിക്കാൻ സാധിച്ചു. 2020ൽ പൂട്ടിക്കിടന്ന മാള ഡി എഫ് നവീകരിച്ച് പ്രവർത്തനമാരംഭിച്ചു. ഇങ്ങനെ മൊത്തത്തിൽ പ്രവർത്തനം വിപുലീകരിക്കാൻ സാധിച്ചതായി ജില്ലാ കയർ പ്രോജക്റ്റ് ഓഫീസർ അറിയിച്ചു.