സര്ട്ടിഫിക്കറ്റുകള് വിതരണം ചെയ്തു
ദോഹ: ആസാദി കാ അമൃത് മഹോത്സവത്തിന്റെയും ലോകകപ്പ് ഫുട്ബാള് നൂറുദിന കൗണ്ട്ഡൗണിന്റെയും ഭാഗമായി ഇന്ത്യന് സ്പോര്ട്സ് സെന്ററും കേരള ബ്ലാസ്റ്റേഴ്സ് ആരാധക കൂട്ടായ്മയായ മഞ്ഞപ്പട ഖത്തറും സംയുക്തമായി സംഘടിപ്പിക്കുന്ന യങ് കൊമ്പന്സ് വേനലവധി സൗജന്യ ഫുട്ബാള് പരിശീലന ക്യാമ്പ് അംഗങ്ങള്ക്ക് സര്ട്ടിഫിക്കറ്റുകള് വിതരണംചെയ്തു. ക്യാമ്പിലെ വിദ്യാര്ഥികളെ പങ്കെടുപ്പിച്ച് വിപുലമായ സ്വാതന്ത്ര്യദിനാഘോഷവും നൂറുദിന കൗണ്ട്ഡൗണ് പരിപാടികളും സംഘടിപ്പിച്ചു. ഒലിവ് ഇന്റര്നാഷനല് സ്കൂളില് നടന്ന പരിപാടി ഖത്തറിലെ ഇന്ത്യന് അംബാസഡര് ഡോ. ദീപക് മിത്തല് ഉദ്ഘാടനം ചെയ്തു. ഇന്ത്യന് സ്പോര്ട്സ് സെന്ററും മഞ്ഞപ്പടയും സംയുക്തമായി സംഘടിപ്പിച്ചുവരുന്ന ഒരുമാസത്തെ സൗജന്യ സമ്മര് ഫുട്ബാള് ക്യാമ്പിനെ അദ്ദേഹം അഭിനന്ദിച്ചു. വളര്ന്നുവരുന്ന തലമുറക്ക് ഫുട്ബാളിന്റെ ബാലപാഠങ്ങള് പകര്ന്നുനല്കുന്ന ക്യാമ്പ് മികച്ചൊരു മുതല്ക്കൂട്ടാവുമെന്ന് അദ്ദേഹം കൂട്ടിച്ചേര്ത്തു.