ഹൈദരാബാദ് തെലങ്കാനയുടെ മാത്രം തലസ്ഥാനം

ഹൈദരാബാദ്: തെലങ്കാനയുടെയും ആന്ധ്രപ്രദേശിന്റെയും സംയുക്ത തലസ്ഥാനമായിരുന്ന ഹൈദരാബാദ്, ജൂണ്‍ 2 ഞായറാഴ്ച മുതല്‍ തെലങ്കാനയുടെ ഏക തലസ്ഥാനമായി മാറിയിരിക്കുന്നു. 2014ലെ ആന്ധ്രാപ്രദേശ് പുനഃസംഘടന നിയമത്തില്‍ പറഞ്ഞിരിക്കുന്ന നിയമങ്ങളുടെ അടിസ്ഥാനത്തിലാണ് ഈ മാറ്റം. 10 വർഷം മുമ്പ് അതായത് 2014 ജൂണ്‍ 2 നാണ് ആന്ധ്രാപ്രദേശ് വിഭജിച്ച്‌ തെലങ്കാന സ്വതന്ത്ര സംസ്ഥാനമായി മാറിയത്. തെലങ്കാനയും ആന്ധ്രാപ്രദേശും രണ്ട് പ്രത്യേക സംസ്ഥാനങ്ങളായി നിലവില്‍ വന്ന ശേഷവും, 10 വർഷത്തേക്ക് ഹൈദരാബാദ് അവരുടെ സംയുക്ത തലസ്ഥാനമായി നിയമപരമായി തന്നെ നിലനിർത്തി. അതിനാല്‍വർഷങ്ങളോളം ഇരു സംസ്ഥാനങ്ങളിലെയും എല്ലാ ഭരണകാര്യങ്ങളും ഹൈദരാബാദ് കേന്ദ്രമാക്കിയാണ് കൈകാര്യം ചെയ്തിരുന്നത്.

എപി പുനഃസംഘടന നിയമം അനുസരിച്ച്‌, “നിയമം നിലവില്‍ വന്ന ദിവസവും (ജൂണ്‍ 2) ശേഷവും, നിലവിലുള്ള ആന്ധ്രാപ്രദേശ് സംസ്ഥാനത്തെ ഹൈദരാബാദ്, തെലങ്കാന സംസ്ഥാനത്തിന്റെയും ആന്ധ്രാപ്രദേശ് സംസ്ഥാനത്തിന്റെയും പൊതു തലസ്ഥാനമായിരിക്കും, എന്നാല്‍ അത്തരം കാലയളവ് പത്തില്‍ കൂടുതല്‍ വർഷങ്ങള്‍ കവിയരുത്. “സബ്–സെക്ഷൻ (1) ല്‍ പരാമർശിച്ചിരിക്കുന്ന കാലയളവ് (പത്ത് വർഷങ്ങള്‍ ) അവസാനിച്ചതിന് ശേഷം, ഹൈദരാബാദ് തെലങ്കാന സംസ്ഥാനത്തിന്റെ തലസ്ഥാനമായിരിക്കും, കൂടാതെ ആന്ധ്രാപ്രദേശ് സംസ്ഥാനത്തിന് ഒരു പുതിയ തലസ്ഥാനം ഉണ്ടായിരിക്കും.”
എന്നാല്‍ വേർപിരിഞ്ഞ് ഒരു പതിറ്റാണ്ട് പിന്നിട്ടിട്ടും, ആസ്തി വിഭജനം ഉള്‍പ്പെടെ പരിഹരിക്കപ്പെടാത്ത വിവിധ പ്രശ്നങ്ങള്‍ ആന്ധ്രാപ്രദേശിനും തെലങ്കാനയ്‌ക്കും ഇടയില്‍ നിലനില്‍ക്കുന്നു.