നടിയെ ആക്രമിച്ച കേസ്; അതിജീവിതയ്‌ക്ക് ഒപ്പം എന്നതിനേക്കാൾ സത്യത്തിനൊപ്പം; കുഞ്ചാക്കോ ബോബൻ

തിരുവനന്തപുരം: നടിയെ ആക്രമിച്ച കേസിൽ സത്യത്തിനൊപ്പമാണ് താനെന്ന് നടൻ കുഞ്ചാക്കോ ബോബൻ. സത്യം പുറത്തു വരുമെന്നും അദ്ദേഹം പറഞ്ഞു. തന്റെ പുതിയ സിനിമയായ ന്നാ താൻ കേസ് കൊട് എന്ന ചിത്രത്തിന്റെ പ്രമോഷനുമായി ബന്ധപ്പെട്ട് തിരുവനന്തപുരം പ്രസ് ക്ലബ് സംഘടിപ്പിച്ച മീറ്റ് ദി പ്രസ് പരിപാടിയിലായിരുന്നു നടന്റെ പ്രതികരണം. ആക്രമിക്കപ്പെട്ട നടിക്കൊപ്പമാണോ എന്ന മാദ്ധ്യമ പ്രവർത്തകന്റെ ചോദ്യത്തിനാണ് കുഞ്ചാക്കോ ബോബൻ മറുപടി നൽകിയത്.

അതിജീവിതയ്‌ക്ക് ഒപ്പം എന്നതിനേക്കാൾ, എല്ലാക്കാലത്തും സത്യത്തിന് ഒപ്പം നിൽക്കുക എന്ന നിലപാടാണ് താൻ സ്വീകരിച്ചിട്ടുള്ളത്. സത്യം ആരുടെ കൂടെയാണോ അവർ വിജയിക്കുമെന്നും കുഞ്ചാക്കോ ബോബൻ പറ‍ഞ്ഞു. എന്തായാലും സത്യം പുറത്തു വരിക തന്നെ ചെയ്യും. അതിന് വേണ്ടിയാണ് താൻ കാത്തിരിക്കുന്നതെന്നുമാണ് നടന്റെ പ്രതികരണം. കേസുമായി ബന്ധപ്പെട്ട് അതിജീവിത കോടതിയിൽ ആശങ്ക അറിയിച്ചിരുന്നു. ഇത് ചൂണ്ടിക്കാണിച്ചു കൊണ്ടായിരുന്നു മാദ്ധ്യമ പ്രവർത്തകന്റെ ചോദ്യം.

അതേസമയം, നടിയെ ആക്രമിച്ച കേസ് പരിഗണിക്കാൻ എറണാകുളം പ്രിൻസിപ്പൽ സെക്ഷൻസ് കോടതിക്ക് കഴിയില്ല എന്ന് പ്രോസിക്യൂഷൻ ഇന്നലെ വ്യക്തമാക്കിയിരുന്നു. സമാന ആക്ഷേപവുമായി അതിജീവിതയും വിചാരണകോടതിയെ സമീപിച്ചിട്ടുണ്ട്. ജഡ്ജി ഹണി എം വർഗീസിന് മുന്നിലാണ് ഇരുകൂട്ടരും അപേക്ഷ സമർപ്പിച്ചിട്ടുള്ളത്.