ശ്രീജ.എസ്
ഡെറാഡൂണ്: ഹരിദ്വാറില് കുംഭമേള 2021ല് നിശ്ചയിച്ച സമയത്തു തന്നെ നടക്കുമെന്ന് ഉത്തരാഖണ്ഡ് മുഖ്യമന്ത്രി ത്രിവേദ സിങ് റവാത്ത്. കുംഭമേളയുടെ ഒരുക്കങ്ങള് സംബന്ധിച്ച് മുഖ്യമന്ത്രിയുടെ വസതിയില് ചേര്ന്ന യോഗത്തിലാണ് അദ്ദേഹം ഇങ്ങനെ അഭിപ്രായപ്പെട്ടത്.
ഹരിദ്വാറില് കുംഭമേള 2021ല് മുന്നിശ്ചയിച്ച പ്രകാരം നടക്കും. എങ്ങനെ നടക്കുമെന്നും ചടങ്ങ് ഏത് രൂപത്തിലായിരിക്കുമെന്നും ആ സമയത്തെ സാഹചര്യം അനുസരിച്ച് തീരുമാനിക്കുമെന്ന് മുഖ്യമന്ത്രി പറഞ്ഞു.
മന്ത്രി മദന് കൗശിക്, അഖില ഭാരതീത അഖാഡ പരിഷത്ത് (എ.ബി.എ.പി) അധ്യക്ഷന് നരേന്ദ്ര ഗിരി എന്നിവരും മറ്റ് അഖാഡ പ്രതിനിധികളും യോഗത്തിനെത്തിയിരുന്നു. അഖാഡയിലേക്കുള്ള റോഡ് പുനര്നിര്മാണം, ശുചിമുറികള് ഉറപ്പാക്കല് തുടങ്ങിയവക്കാണ് പ്രത്യേക പരിഗണന നല്കുന്നതെന്ന് മുഖ്യമന്ത്രി വ്യക്തമാക്കി.
കുംഭമേളയില് പര്വത നിരകള്ക്ക് 13 അഖാഡകളുടെയും കുലദൈവങ്ങളുടെ പേര് നല്കണമെന്ന് എ.ബി.എ.പി അധ്യക്ഷന് യോഗത്തില് മുഖ്യമന്ത്രിയോട് അഭ്യര്ഥിച്ചു. കൂടാതെ മറ്റ് ജോലികളോടൊപ്പം ജല വിതരണം, വൈദ്യുതി ബന്ധം, ശുചിമുറികളുടെ അറ്റകുറ്റ പണികള് തുടങ്ങിയവയും ചെയ്തു തരണമെന്നും അദ്ദേഹം ആവശ്യപ്പെട്ടു.
തീര്ഥാടകര്ക്ക് മതിയായ ഭൗതിക സാഹചര്യങ്ങള് ഒരുക്കുന്നതിനായി 13 അഖാഡകള്ക്കും സാമ്പത്തിക സഹായം ലഭ്യമാക്കുന്ന കാര്യം സര്ക്കാരിന്റ പരിഗണനയിലുണ്ടെന്ന് മുഖ്യമന്ത്രി പറഞ്ഞു.