![“Manju”](https://santhigirinews.org/wp-content/uploads/2020/04/YOUTUBE.jpg")
ചെന്നൈ: സാമുദായിക വികാരം വ്രണപ്പെടുത്തിയെന്ന പരാതിയില്‍ തമിഴ്നാട്ടില്‍ ബി.ജെ.പി നേതാവ് അറസ്റ്റിലായി.
ഭാരതീയ ജനതാ മസ്ദൂര്‍ മഹാസംഘം മുന്‍ ദേശീയ സെക്രട്ടറിയും ബി.ജെ.പി നേതാവുമായ കല്യാണരാമനുള്‍പ്പെടെ മൂന്ന് പേരെയാണ് മേട്ടുപ്പാളയം പൊലീസ് അറസ്റ്റ് ചെയ്തത്. ടൗണില്‍ നടന്ന പരിപാടിക്കിടെ പ്രവാചകനെ അപകീര്‍ത്തിപ്പെടുത്തുന്ന രീതിയില്‍ പ്രസംഗിച്ചുവെന്നും കലാപത്തിന് ആഹ്വാനം ചെയ്തുവെന്നുമാണ് ആരോപണം.
ബി.ജെ.പിയുടെ കോയമ്പത്തൂര്‍ നോര്‍ത് ജില്ലാ പ്രസിഡന്റ് ജഗനാഥന്‍, ഡിവിഷനല്‍ സെക്രട്ടറി സതീഷ് കുമാര്‍ എന്നിവരാണ് കല്യാണരാമനൊപ്പം അറസ്റ്റിലായ മറ്റ് രണ്ടുപേര്‍. ഇവരെ അവിനാശി സബ്ജയിലില്‍ പ്രവേശിപ്പിച്ചു.
വര്‍ഗീയ കലാപമുണ്ടാക്കല്‍, നിയമവിരുദ്ധമായി സംഘം ചേരല്‍, മതവികാരം വ്രണപെടുത്തല്‍ തുടങ്ങിയ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. കര്‍ഷക സമരത്തെ പിന്തുണച്ച്‌ എസ്.ഡി.പി.ഐ റിപബ്ലിക് ദിനത്തില്‍ പ്രദേശത്ത് നടത്തിയ പരിപാടിയില്‍ പ്രധാനമന്ത്രി നരേന്ദ്ര മോദിയെ അപമാനിച്ചെന്നാരോപിച്ച്‌ ബി.ജെ.പി നടത്തിയ യോഗത്തിലായിരുന്നു വിവാദ പരാമര്‍ശങ്ങള്‍.
‘കല്യാണരാമന്റെ പ്രസംഗം കേട്ടെത്തിയ എസ്.ഡി.പി.ഐ പ്രവര്‍ത്തകര്‍ ബി.ജെ.പിക്കെതിരെ മുദ്രാവാക്യം മുഴക്കി. ശേഷം ഇവരെ അനുനയിപ്പിച്ച്‌ പറഞ്ഞയച്ചെങ്കിലും ശേഷം യോഗത്തിനു നേരെ കല്ലേറുണ്ടായി. കല്ലേറുണ്ടായ സംഭവത്തില്‍ 30 ഓളം എസ്.ഡി.പി.ഐ പ്രവര്‍ത്തകരെ അറസ്റ്റ് ചെയ്തു’ -മേട്ടുപ്പാളയം എസ്.പി അറ അരുളരശ് പറഞ്ഞു. ബി.ജെ.പി-എസ്.ഡി.പി.ഐ സംഘര്‍ഷ സാധ്യത കണക്കിലെടുത്ത് പ്രദേശത്ത് വന്‍ പൊലീസ് സന്നാഹത്തെ വിന്യസിച്ചിട്ടുണ്ട്.
