‘ദിവ്യപൂജാസമർപ്പണം’ പ്രാർത്ഥനാനിർഭരം;നവഒലി ആഘോഷങ്ങൾ സമാപിച്ചു.

പോത്തൻകോട് : ഭക്തിയുടെയും പ്രാർത്ഥനയുടെയും നിറവിൽ ഇരുപത്തിമൂന്നാമത് നവഒലി ജ്യോതിർദിനാഘോഷങ്ങൾക്ക് സമാപനം കുറിച്ച് ദിവ്യപൂജാസമർപ്പണം നടന്നു. ശാന്തിഗിരി ആശ്രമ സ്ഥാപക ഗുരു  നവജ്യോതി ശ്രീകരുണാകരഗുരു ആദിസങ്കൽപ്പത്തിൽ ( ദേഹവിയോഗം) ലയിച്ചത് മെയ് 6 ന് ആണെങ്കിലും മെയ് 7 ന് അഞ്ചുമണിയുടെ ആരാധനയോട് കൂടിയാണ് ഭൗതികശരീരം പർണ്ണശാലയിൽ അടക്കം ചെയതത്. ഇത് ദിവ്യപൂജാസമർപ്പണമായി ശാന്തിഗിരി പരമ്പര ആചരിക്കുന്നു. എല്ലാ വർഷവും നവഒലി ജ്യോതിർദിനാഘോഷങ്ങൾ അവസാനിക്കുന്നത് ദിവ്യപൂജ സമർപ്പണത്തോടെയാണ്.

ദിവ്യപൂജാസാമർപ്പണത്തിന്റെ ഭാഗമായി ഇന്ന് വൈകിട്ട് 5 ന് ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വിയുടേയും പ്രസിഡന്റ് സ്വാമി ചൈതന്യ ജ്ഞാന തപസ്വിയുടേയും നേതൃത്വത്തിലുള്ള സന്യാസി സംഘം ആശ്രമത്തിൽ പ്രത്യേക പ്രാർത്ഥന നടത്തി. സന്യാസി-സന്യാസിനിമാരുടെ നേതൃത്വത്തിൽ പർണശാലയിൽ പ്രത്യേക പുഷ്പാഞ്ജലി നടന്നു. വിവിധ ഏരിയകളിൽ നിന്നെത്തിയ ഗുരുഭക്തരും അഖണ്ഡനാമ മന്ത്രോച്ചാരണത്തോടെ പ്രാർത്ഥനാനിർഭരമായി ചടങ്ങുകളിൽ പങ്കെടുത്തു.