![“Manju”](https://santhigirinews.org/wp-content/uploads/2020/04/YOUTUBE.jpg")
ന്യൂഡല്‍ഹി: രാജ്യത്ത് മൂന്നാംതരംഗത്തില്‍ അതിതീവ്ര വൈറസ് ബാധയാണ് പടര്‍ന്നുപിടിക്കുന്നതെങ്കില്‍ ഒന്നാം തരംഗത്തിന് സമാനമായിരിക്കും മൂന്നാം തരംഗമെന്ന് പഠനം. അതീതീവ്ര വൈറസ് ബാധയല്ലെങ്കില്‍ ചെറിയ അലയൊലികള്‍ പോലെ കടന്നുപോകുമെന്നും സൂത്ര അനാലിസിസ്. കേന്ദ്രസര്‍ക്കാറിന് കീഴില്‍ ശാസ്ത്ര സാങ്കേതിക വകുപ്പ് രൂപീകരിച്ച വിദഗ്ധ പാനലാണ് സൂത്ര മോഡല്‍. കോവിഡ് വ്യാപനത്തെക്കുറിച്ച്‌ ഗണിതശാസ്ത്രത്തിന്റെ സഹായത്തോടെ വിലയിരുത്തുകയാണ് മൂന്ന് അംഗ പാനലിന്റെ ലക്ഷ്യം.
എം. അഗര്‍വാള്‍ (ഐ.ഐ.ടി കാണ്‍പൂര്‍), എം കനിത്കാര്‍, എം. വിദ്യാസാഗര്‍ (ഐ.ഐ.ടി ഹൈദരാബാദ്) എന്നിവരാണ് സമിതി അംഗങ്ങള്‍. രാജ്യത്തിന്റെ കോവിഡ് വ്യാപനത്തിന്റെ തോതും കാലയളവും അളക്കുകയാണ് അവലോകനത്തിന്റെ ലക്ഷ്യം.
ആര്‍ജിത പ്രതിരോധ ശേഷി നഷ്ടപ്പെടല്‍, വാക്സിനേഷനിലൂടെ ആര്‍ജിച്ചെടുത്ത പ്രതിരോധ ശക്തി എന്നിവ കണക്കാക്കിയാകും മൂന്നാംതരംഗത്തിെന്‍റ പ്രവചനം. കൂടാതെ പുതിയ വൈറസുകള്‍ പടര്‍ന്നുപിടിക്കാനുള്ള സാധ്യതയും അതിന്റെ വ്യാപനശേഷിയും ഇവര്‍ കണക്കാക്കിയിരുന്നു. കൂടാതെ രണ്ടാംതരംഗം നേരിട്ടതോടെ ആളുകളടെ ജീവിത ശൈലിയിലും മാനദണ്ഡങ്ങള്‍ പാലിക്കുന്നതിലും വന്ന മാറ്റങ്ങളും പരിശോധനക്കെടുത്തതായി പ്രഫസര്‍ എം. അഗര്‍വാള്‍ പറഞ്ഞു.
കണക്കുകൂട്ടലുകളുടെ അടിസ്ഥാനത്തില്‍ ആഗസ്റ്റ് അവസാനമോ സെപ്റ്റംബര്‍ ആദ്യമോ രണ്ടാംതരംഗം ഏറ്റവും താഴ്ന്ന നിലയിലെത്തും. ചിലപ്പോള്‍ അനുമാനങ്ങളെല്ലാം തെറ്റായിരിക്കാമെന്നും അദ്ദേഹം കൂട്ടിച്ചേര്‍ക്കുന്നു.
