മൈക്രോസോഫ്റ്റ് പരീക്ഷയില് ഉയര്ന്ന മാര്ക്ക് നാലുവയസുകാരിയ്ക്ക്
ഇസ്ലാമാബാദ്: മൈക്രോസോഫ്റ്റ് സര്ട്ടിഫൈഡ് പ്രഫഷനല് പരീക്ഷയില് ഉയര്ന്ന മാര്ക്ക് സ്വന്തമാക്കിയിരിക്കുകയാണ് പാകിസ്ഥാന് സ്വദേശിയായ നാലുവയസുകാരി. പാകിസ്ഥാനിലെ കറാച്ചിയില് നിന്നുള്ള നാലുവയസുകാരിയായ ആരിഷ് ഫാത്തിമയാണ് കുഞ്ഞുപ്രായത്തില് വലിയ നേട്ടം കയ്യെത്തിപ്പിടിച്ചത് .ഇതോടെ മൈക്രോസോഫ്റ്റിന്റെ ഏറ്റവും പ്രായം കുറഞ്ഞ പ്രഫഷനലായി ആരിഷ് ഫാത്തിമ മാറി.
മൈക്രോസോഫ്റ്റിന്റെ പരീക്ഷയില് 831 മാര്ക്കാണ് ഈ കൊച്ചുമിടുക്കി കരസ്ഥമാക്കിയത് . പാകിസ്ഥാന് സര്ക്കാര് ട്വിറ്ററിലൂടെ അറിയിച്ചതാണ് ഇക്കാര്യം. എം.എസ്.പി പരീക്ഷ വിജയിക്കാനുള്ള കുറഞ്ഞ മാര്ക്ക് 700 ആണ്. അതിനെ മറികടന്നാണ് നാലുവയസുകാരി അപൂര്വ്വ നേട്ടം കൊയ്തതെന്ന് റിപ്പോര്ട്ട്.
സാങ്കേതിക വിദ്യയില് മകളുടെ അഭിരുചി മനസിലാക്കി ആരിഷ്ന്റെ പിതാവ് ഒസാമയാണ് കുട്ടിക്ക് മികച്ച പിന്തുണയേകിയത് .ലോക്ഡൗണില് വീട്ടിലിരുന്നപ്പോള് കുട്ടിയെ പഠനത്തില് സഹായിക്കുകയും ചെയ്തു. ഐ.ടി വിദഗ്ധനാണ് ഒസാമ. 4 വയസുകാരിയുടെ നേട്ടത്തില് സന്തോഷം പങ്കുവെക്കുകയാണ് ആരിഷിന്റെ മാതാപിതാക്കള്.