സന്ദര്ശക വിസക്കാര്ക്ക് ഗള്ഫിലേക്ക് മെഡിക്കല് പരിശോധന ആവശ്യമില്ല
ദുബൈ: സന്ദര്ശക വിസയില് ഗള്ഫ് രാജ്യങ്ങളിലേക്ക് പോകുന്നവര്ക്ക് മെഡിക്കല് പരിശോധന വേണമെന്നറിയിച്ച് കേരളത്തില് തട്ടിപ്പ്. ജോലി തേടിയെത്തുന്നവരില് നിന്നാണ് പ്രധാനമായും പണം തട്ടുന്നത്. ഗള്ഫ് രാജ്യങ്ങളിലേക്ക് സന്ദര്ശക വിസയില് പോകുന്നവര്ക്ക് കേരളത്തില് മെഡിക്കല് പരിശോധന ആവശ്യമില്ലെന്നിരിക്കെയാണ് ഈ പേരില് തട്ടിപ്പ് നടത്തുന്നത്. ചില ലാബുകാരുമായി ചേര്ന്ന് വ്യാജ ഏജന്റുമാരാണ് തട്ടിപ്പിന് പിന്നില്.
അടുത്തിടെ ജോലി തട്ടിപ്പിനിരയായി യു.എ.ഇയില് എത്തിയ പലരില് നിന്നും ഇത്തരത്തില് തുക തട്ടുകയും പരിശോധനക്ക് വിധേയമാക്കുകയും ചെയ്തിരുന്നു. ചില വിദേശ രാജ്യങ്ങളിലേക്ക് പോകുമ്ബോള് നാട്ടില് നിന്ന് മെഡിക്കല് പരിശോധന പൂര്ത്തിയാക്കണമെന്നുണ്ട്. എന്നാല്, ആറ് ഗള്ഫ് രാജ്യങ്ങളിലേക്കും സന്ദര്ശക വിസക്കാര്ക്ക് മെഡിക്കല് ടെസ്റ്റ് ആവശ്യമില്ല. പുതിയ വിസയിലേക്ക് മാറുമ്ബോള് ഗള്ഫില് നിന്ന് തന്നെയാണ് മെഡിക്കല് എടുക്കേണ്ടത്.
മെഡിക്കല് പരിശോധനക്ക് എന്ന പേരില് 1000 മുതല് 3000 രൂപ വരെ ഈടാക്കുന്നുണ്ട്. ഇതിന് ശേഷം ഇവരെ ഏതെങ്കിലും ലാബിലേക്ക് അയച്ച് പരിശോധന നടത്തുകയാണ് ചെയ്യുന്നത്. ലാബുകാരുമായി ഒത്തുകളിച്ചാണ് ഇത്തരം തട്ടിപ്പ്. ഇതോടെ, നാട്ടിലും വിദേശത്തും മെഡിക്കല് പരിശോധനക്ക് വിധേയരാകേണ്ടി വരുകയും ധനനഷ്ടമുണ്ടാകുകയും ചെയ്യുന്നു.
സന്ദര്ശക വിസക്കാര്ക്ക് പുറമെ റസിഡന്റ് വിസയില് യു.എ.ഇ അടക്കമുള്ള ചില രാജ്യങ്ങളിലേക്ക് പോകുന്നവര്ക്കും മെഡിക്കല് പരിശോധന ആവശ്യമില്ല. പുതിയ വിസ നടപടികളുടെ സമയത്ത് യു.എ.ഇയിലെ ലാബുകളിലാണ് പരിശോധന നടത്തേണ്ടത്.
എന്നാല്, സൗദിയിലേക്ക് തൊഴില് വിസയില് പോകുന്നവര്ക്ക് കേരളത്തില് നിന്ന് മെഡിക്കല് ആവശ്യമാണ്. പുതിയ യാത്രക്കാരുടെ പരിചയക്കുറവ് മുതലെടുത്താണ് തട്ടിപ്പ് അരങ്ങേറുന്നത്. കടം വാങ്ങിയും പണയം വെച്ചുമാണ് പലരും ഗള്ഫിലേക്ക് ആദ്യ യാത്രക്കിറങ്ങുന്നത്. ഇത്തരക്കാരെയാണ് വ്യാജ ഏജന്റുമാര് തട്ടിപ്പിന് വിധേയരാക്കുന്നത്.