കാബൂള് സ്ഫോടനത്തില് മരിച്ചവരുടെ എണ്ണം 73 ആയി
കാബൂള്: കാബൂള് വിമാനത്താവളത്തിന് പുറത്ത് തടിച്ചുകൂടിയ ജനക്കൂട്ടത്തിനിടയിലുണ്ടായ ഇരട്ട ചാവേര് സ്ഫോടനത്തില് മരിച്ചവരുടെ എണ്ണം 13 അമേരിക്കന് സേനാംഗങ്ങളടക്കം 73 ആയി. 140 ലേറെ പേര്ക്ക് പരിക്കേറ്റു. വ്യാഴാഴ്ച വൈകീട്ട് വിമാനത്താവള കവാടത്തിനരികിലാണ് സ്ഫോടനം. 60 സ്വദേശികളും 11 യു.എസ് മറീനുകളും ഒരു നേവി മെഡിക്കല് ഉദ്യോഗസ്ഥനുമാണ് കൊല്ലപ്പെട്ടതെന്ന് അമേരിക്കന് പ്രതിരോധ വിഭാഗമായ പെന്റഗണ് സ്ഥിരീകരിച്ചു.
15 ഓളം സേനാംഗങ്ങള്ക്കു പരിക്കേറ്റതായും പെന്റഗണ് അറിയിച്ചു. സ്ഫോടനത്തിനുപിന്നില് ഐ.എസ് ആണെന്ന് താലിബാന് വൃത്തങ്ങള് അറിയിച്ചു. യു.എസ് സേനയുടെ നിയന്ത്രണത്തിലുള്ള മേഖല ലക്ഷ്യമിട്ടായിരുന്നു ആക്രമണം. അഫ്ഗാനികള്ക്കു പുറമെ ഏതൊക്കെ രാജ്യക്കാരാണ് കൊല്ലപ്പെട്ടതെന്ന് വ്യക്തമായിട്ടില്ല. താലിബാന് സേനാംഗങ്ങള്ക്കും പരിക്കേറ്റുവെന്ന് റിപ്പോര്ട്ടുണ്ട്.