മുംബൈ: ബോളിവുഡിനെ വീണ്ടും പിടിച്ചുകുലുക്കി ആഢംബര കപ്പലിലെ മിന്നല് റെയ്ഡ്. ആഢംബര കപ്പലിലെ ലഹരിപ്പാര്ട്ടിയാണ് എന്.സിബി സംഘം റെയ്ഡിലൂടെ പൊളിച്ചടുക്കിയത്. മുംബൈ സോണല് ഡയറക്ടറായ സമീര് വാങ്കഡെയുടെ നേതൃത്വത്തിലാണ് ഷാരൂഖ് ഖാന്റെ മകന് ആര്യന് ഖാനെ ഉള്പ്പെടെ കസ്റ്റഡിയിലെടുത്ത റെയ്ഡ് നടന്നത്.
കഴിഞ്ഞവര്ഷം നടന് സുശാന്ത് സിങ് രാജ്പുത്തിന്റെ മരണവുമായി ബന്ധപ്പെട്ട ലഹരിമരുന്ന് കേസിലാണ് സമീര് വാങ്കെഡെ എന്ന എന്.സി.ബി. ഉദ്യോഗസ്ഥന് വാര്ത്തകളിലിടം നേടുന്നത്. നടി റിയ ചക്രവര്ത്തി ഉള്പ്പെടെയുള്ളവരുടെ അറസ്റ്റിലേക്ക് നയിച്ച കേസില് ഒട്ടേറെ പ്രമുഖരെയാണ് എന്.സി.ബി. സംഘം ചോദ്യംചെയ്തത്. മുംബൈ കേന്ദ്രീകരിച്ചുള്ള പല മയക്കുമരുന്ന് വില്പ്പനക്കാരും പിന്നീട് പിടിയിലാവുകയും ചെയ്തു. എന്.സി.ബി. മുംബൈ സോണല് ഡയറക്ടാറയ സമീര് വാങ്കെഡെയായിരുന്നു ഈ ഓപ്പറേഷനുകള്ക്കെല്ലാം നേതൃത്വം വഹിച്ചിരുന്നത്.
കസ്റ്റംസ് ഓഫീസറായിരിക്കെ സിനിമാതാരങ്ങള് ഉള്പ്പെടെയുള്ള സെലിബ്രിറ്റികള്ക്ക് യാതൊരു ഇളവും നല്കാത്ത ഉദ്യോഗസ്ഥനായിരുന്നു സമീര് വാങ്കെഡെ. വിദേശരാജ്യങ്ങളില്നിന്ന് കൊണ്ടുവരുന്ന വസ്തുക്കള് കൃത്യമായ നികുതി ഈടാക്കാതെ വിട്ടുനല്കിയിരുന്നില്ല. 2013-ല് മുംബൈ വിമാനത്താവളത്തില്വെച്ച് ഗായകന് മിക സിങ്ങിനെ വിദേശകറന്സിയുമായി പിടികൂടിയത് സമീര് വാങ്കെഡെയായിരുന്നു. 2011-ലെ ക്രിക്കറ്റ് ലോകകപ്പിന്റെ സ്വര്ണക്കപ്പ് പോലും മുംബൈ വിമാനത്താവളത്തില്നിന്ന് വിട്ടുനല്കിയത് കസ്റ്റംസ് ഡ്യൂട്ടി അടച്ചതിനുശേഷമാണ്.
2008 ബാച്ചിലെ ഐ.ആര്.എസ്. ഓഫീസറാണ് സമീര് വാങ്കെഡെ. മുംബൈ വിമാനത്താവളത്തില് കസ്റ്റംസ് ഓഫീസറായാണ് തുടക്കം. പിന്നീട് എയര് ഇന്റലിജന്സ് യൂണിറ്റ് ഡെപ്യൂട്ടി കമ്മീഷണര്, എന്.ഐ.എ. അഡീഷണല് എസ്.പി, ഡി.ആര്.ഐ. ജോയിന്റ് കമ്മീഷണര് തുടങ്ങിയ പദവികളിലും പ്രവര്ത്തിച്ചു. ഇതിനുശേഷമാണ് എന്.സി.ബി.യില് എത്തുന്നത്.
എന്.സി.ബി.യില് ചുമതലയേറ്റെടുത്ത ശേഷം ഏകദേശം 17000 കോടി രൂപയുടെ ലഹരിമരുന്ന് വേട്ടയാണ് സമീര് വാങ്കെഡെയുടെ നേതൃത്വത്തില് നടന്നത്.